Djabièrnè dia 21 di febrüari último di un manera festivo a habri e parke di awa nobo; Kunuku’s Waterworld. Sr. Prome Minister Gilmar ‘Pik’ Pisas tabata presente p’e apertura. E parti nobo i espektakular di Kunuku Aqua Resort ta ofresé un eksperensia úniko ku sinku tobogan nobo, situá den un pisina di no ménos ku 1200 m2. E parke di awa situá na Weg naar St. Willibrordus ta un gran adishon na e resort i su ofertanan rekreativo na Kòrsou, i ta primintí dibertishon pa grandi i chikitu.
Muchanan a gosa sin fin:
Pa selebrá e okashon spesial aki, Kunuku Aqua Resort a invitá dies klas (grupo 3 t/k 8) for di diferente skol repartí riba nos isla pa asistí na e apertura ofisial. E muchanan a disfrutá inmensamente di e atrakshonnan nobo i tabatin un eksperensia bunita i un dia inolvidabel.
Un parke di awa pa henter famia:
Ku apertura di Kunuku su Waterworld, Kunuku Aqua Resort ta pone un norma nobo pa dibertishon den awa riba nos isla. E ekspanshon ta proveé mas aventura i entretenimentu pa tur dos tipo di bishitante; lokal i turista. “Nos ta sumamente orguyoso di e adishon aki na nos resort. Wout Tieleman, propietario di Kunuku Aqua Resort a bisa, “Nos meta ta pa ofresé famianan un eksperensia úniko na unda nan por disfrutá di un sin fin di dibertishon huntu”. Ademas di e parke di awa nobo, e resort resientemente a duna su ‘Kids Paradise’ un ‘upgrade’ grandi i e promé ‘slide’ konstruí, a keda kompletamente renobá. Ademas, e adishon di mashinnan di ‘gaming’ i otro fasilidatnan nobo ta sòru pa tin hopi kos pa hasi pafó di awa tambe. Kunuku Aqua Resort -parti di e marka di kadena hotelero Wyndham- ta úniko den su estilo pa motibu di su variashon di entretenimentu pa adulto i mucha. E resort ta sigui inová i invertí den e eksperensia di vakashon i dibertishon. Ku apertura di Kunuku su Waterworld, Kunuku Aqua Resort ta bira un destinashon aun mas atraktivo pa kualke hende ku ta buskando relahamentu i aventura na Kòrsou. Pa mas informashon tokante Kunuku’s Waterworld i Kunuku Aqua Resort, por bishitá https://kunukuresort.com/waterworld/ òf tuma kontakto ku [email protected]
