Avila Beach Hotel a kuminsá 2025 ku resultadonan impreshonante. Yanüari di e aña akí a keda komo e luna di reservashon ku mas éksito den historia di e hotèl. Ku serka di 200.000 bishitante via di nan wèpsait i mas ku 55% di reservashon direktamente di nan propio wèpsait. Avila Beach Hotel a kibra un rèkòrt nobo, komprobando su popularidat komo un destinashon tòp den Karibe.
Rekonesementu internashonal i wèpsait premiá
Resientemente e hotèl a risibí dos rekonesementu importante. Nan wèpsait Hulandes a gana e título di Wèpsait di Aña 2025. E premio akí ta reflehá inovashon digital i fasilidat di uso pa tur usario. Ademas, Avila Beach Hotel, ku ta e hotèl mas antiguo operashonal na Kòrsou, ta nominá pa e prestigioso “LUXE Global Awards”, un rekonesementu internashonal pa hotèlnan di luho ku ta proveé un eksperensia eksepshonal di hospitalidat.
Turismo sostenibel i inisiativanan pa medio ambiente
Sostenibilidat ta keda un punto di enfoke importante pa Avila Beach Hotel. Tras di kortina, nan ta traha riba inisiativanan nobo, pa redusí konsumo di energia i kontribuí na un Kòrsou mas ekológiko..
Kolaborashon inovativo ku sinematógrafo Dolph van Stapele
21 di febrüari 2025, Avila Beach Hotel lo lansa un kolaborashon eksklusivo ku sinematógrafo Dolph van Stapele. Den e kolaborashon akí, lo tin workshòpnan di fotografía i videografía pa ‘smartphone’, esaki lo ta habrí pa tur huéspet di hotèl i lokalnan. Durante e seshonnan interaktivo akí, partisipantenan lo siña kon por saka potrèt i video profeshonal ku nan iPhone. Den un tempu kaminda fotografia ta un di e abilidatnan mas pidí mundialmente, e workshòp akí no solamente ta mehorá e eksperensia di vakashon, sino tambe ta krea memorianan di kalidat haltu ku lo keda pa semper.
Avila Beach Hotel, konosí komo un di e lugánan mas fotografiá na Kòrsou, ta e lugá perfekto pa siña e arte di fotografia ku su playa blanku, hukinan pintoresko i hardinnan luhoso. E workshòpnan lo tuma lugá kada djaluna i djabièrne, na e idioma hulandes i ingles, i lo tin un preis lokal spesial pa residente di Kòrsou. Pa mas informashon, bishitá wèpsait di Avila Beach Hotel òf mail na [email protected].
Fokùs riba kresementu i bienestar di empleado
Na Avila Beach Hotel, no solamente kresementu ta sentral, pero tambe bienestar i desaroyo di su empleadonan. Den 2025, nan lo bolbe benefisiá di varios kursonan i tayer, inkluyendo lèsnan di idioma pa por enfoká mihó riba e merkado Brasilero ku ta sigui krese. Ádemas, ta ofresé kurso adishonal di hulandes i ingles.
Desaroyo personal i profeshonal ta haña hopi atenshon. Asina, na kuminsamentu di e aña akí a tuma lugá e tayer, Vision Board 2025, enfoká riba pone i realisá metanan personal i profeshonal. Ádemas, den 2025 lo tin mas tayer pa yuda empleadonan mantené un balansa saludabel entre trabou i nan bida personal, un estilo di bida mas salú i estabilidat finansiero. Empleadonan por konta riba sosten práktiko, manera yudansa ku deklarashon di impuesto, manehamentu di presupuesto i manera di hasi uso di plaka mas sabí. Tambe, ta stimulá deporte: empleadonan por hasi uso di un “gym” na un tarifa redusí, ku gastunan parsialmente kubrí dor di Avila. Ádemas, ta organisá diferente aktividatnan di deporte, no solamente pa bienestar personal, sino tambe pa fortalesé e “team spirit”. Durante “training”nan interno i reunionnan, semper tin snèknan saludabel disponibel i adishonal, ta ofresé fruta huntu ku e kuminda pa empleadonan.
Lo mantené e proseduranan pa bienestar sin duda den 2025. E ékipo di Avila ta keda mehorá i krese konstantemente, i aktualmente tin algun vakaturanan habrí pa esnan ku lo ke forma parti di e ambiente di trabou dinámiko i plasentero. E maneho di personal akí tambe lo ta implementá na TUI Blue ku na e momentu nan akí ta den proseso di konstrukshon na Santa Martha i lo habri su portanan den 2026
Ku un komienso rèkòrt, inovashonnan stratégiko i un enfoke kontinuo riba kalidat i sostenibilidat, 2025 ta prometé di ta un aña próspero pa Avila Beach Hotel.
