Djabièrnè mainta trempan manera un solo briante despues di áwaseru, KJ74 Entertainment ta regalá Kòrsou un vershon ‘mainstream’ di Amos Balentin su tumba “Bai Pe”. E tumba komponé dor di Amos Balentin pa su partisipashon na Festival di Tumba 2025 awor tin ‘bida nobo’ despues di karnaval den bachi di un tambú modèrno. Un ritmo estilo muzik di zumbi kombiná ku aksènt urban te ingredientenan prinsipal. Areglista di “Bai Pe” Derrel ”Titi” De Palm ta masha orguyoso di e produkshon genériko di e tumba tan popular di AMOS. P’e produkshon aki a kolaborá Ingeniero; Efrem Mambi, Artista Asosiá; Marystella Bernabela, Video Clip; Ryan QD Navarro i Grupo Sablika. AMOS a kompartí un mensahe riba su retnan sosial na momentu ku e’la lansa “Bai Pe” bisando, “Tur kos den bida ta nos mente. Bisando bo mes, bo por i purbando pa logra ya kaba ta un logro paso ba purba apesar ku e no ta fásil ni imposibel. Bai pe. Bo por. No give up. Un regalo di nos p’abo”.
Ku e vershon renobá, “Bai Pe” tin tur ingrediente pa zona na radio durante henter aña. For di despues di Festival di Tumba 2025, fanátikonan a vosifera ku e tumba ta unu ‘pa henter aña’, esaki mes ta loke a hasié un di e tumbanan mas popular den temporada di karnaval, inkluyendo jump-in. KJ74 Entertainment a skucha tur fanátiko i awe ta un honor pa duna rosea nobo n’e tremendo komposishon aki. Solisit’é na bo radio preferí i lag’e inspirábo, pa bai pa tur bo soñonan! Suskribí na kanal di YouTube KJ74 Entertainment i stream riba iTunes/ Spotify/ Tidal/ Apple Music.
