Manera edishonnan anterior, ‘Color Walk 2025’ tabata un éksito i a duna partisipantenan e oportunidat pa yena nan bida i di otronan ku koló. Selebrando 75 aña di EY, e fundashon EY Cares a organisá ‘Color Walk’, pa duna bèk na komunidat. Banco di Caribe ta orguyoso di por a kontribuí n’e kousa di un otro kompania tambe. Di e forma aki ta demostrá ku siudadanonan korporativo por traha huntu pa un kousa komun.
EY Cares su meta pa ku e evento tabata pa rekoudá fondo pa sostené SGR Groep den nan esfuerso pa mehorá kalidat di bida di esnan ku un desabilidat den nos komunidat. Un parti di e fondo tambe ta destiná pa EYoung Talent Fund, ku ta duna sosten na nos hobennan atlétiko i artistiko, pa por kontinuá ku e desaroyo di nan talento. Ku e lema ‘Color your life, by coloring others’, e fundashon a trese komunidat huntu pa kana, baila i gosa pa un bon kousa, miéntras nan ta wòrdu kubrí ku puiru di koló riba e ruta. E puiru kolorido t’e elemento prinsipal ku ta hasi e kaminata aki diferente i sumamente popular!
Partisipantenan a reuní mainta trempan pa un ‘warm up’ na Parasasa Beach, ansioso pa eksperensiá e diferente stashonnan di koló den área di Koredor i Piscadera. N’e stashon oraño di Banco di Caribe, partisipantenan por a disfrutá di un tremendo ambiente inkluyendo músika, artista i diferente premio. Esaki tabata un final perfekto p’e kaminata nèt promé ku e ‘Big Splash’.
Aparte di agregá koló n’e kaminata, Banco di Caribe a kontribuí pa klientenan di SGR Groep keda transportá pa eksperensiá e gran evento. EY Cares por mira bèk riba un tremendo ‘Color Walk’. Banco di Caribe ta kontentu di por a sostené e fundashon su meta pa trese desaroyo positivo den nos komunidat i alabes krea momentonan dibertido i memorabel p’e partisipantenan.
