Fundashon Alton Paas resientemente a selebrá e désimo aniversario di ‘The Annual Fitness Challenge’. Tur aña di nobo e proyekto a demostrá kresementu i awor por konsider’é e proyekto di mas grandi di e fundashon pa rekoudá fondo i sostené nan meta pa mehorá kalidat di bida di personanan ku ‘dwarslesie’ i otro problemanan neurológiko den nos komunidat. E aña aki tambe Banco di Caribe a sostené Fundashon Alton Paas su vishon pa inkluí personanan desabilitá mas tantu posibel den komunidat dor di kubri ehersisio- i eventonan spesial i transporte adekuá.
‘The Annual Fitness Challenge’
Manera añanan anterior den ‘The Annual Fitness Challenge’ partisipantenan por a bishitá kuater área di moveshon pa hasi ehersisio, spinning i partisipá den kaminata di 5 òf 10 km. Pa e di 10 edishon, e fundashon a agregá e área ‘Kids Power Zone’ kaminda muchanan di diferente edat por tabata aktivo i reta nan mes pa kompletá e ehersisionan ku unidat di Defensa Kòrsou a krea pa nan. Personanan den ròlstul tambe por a partisipá na ‘The Annual Fitness Challenge’, pa kua e fundashon a hasi uso di nan propio ‘Wheelee Service’. Esaki ta un servisio mobil ku ta yuda esnan den ròlstul haña transporte di manera ku nan por sali kas ku mas fasilidat.
Ta p’esei Banco di Caribe ta kontentu di por a kontribuí na un proyekto mas di Fundashon Alton Paas pa por atkerí un vehíkulo nobo pa sigui brinda su ‘Wheelee Service’. Kada kontribushon ta yuda mantené e inisiativanan di Fundashon Alton Paas i ta sigui konsientisá nos komunidat pa mehorá e kalidat di bida di esnan desabilitá. Banco di Caribe ta felisitá Fundashon Alton Paas ku un tremendo edishon di ‘The Annual Fitness Challenge’ i deseá nan hopi éksito pa kontinuá ku e trabounan.
