Pa di nuebe aña konsekutivo, Sentro pa Inovashon i Guia Edukashonal (SIGE) a organisá nan proyekto ‘Duna un Man na bo Ruman’. E meta di e proyekto ta pa duna sosten na muchanan di ménos rekurso mediante tas i material di skol, di manera ku nan por kuminsá un aña eskolar ku motivashon i konfiansa propio. Esaki sigur lo garantisá un aña eskolar eksitoso.
A entregá e tas- i materialnan:
Despues di algun luna di preparashon, e tim di SIGE por a entregá e tas- i materialnan n’e diferente skol i instansianan ku a duna nòmber di alumnonan ku tin mester di e sosten aki.
Un proyekto ku a keda inisiá komo medio di kontribushonnan na komunidat a desaroyá den un proyekto masha bunita. Aktualmente, SIGE por konta ku donashon di diferente kompania. Banco di Caribe tambe ta kontentu di a aportá na e proyekto di SIGE i tabata presente durante e entrega.
Sra. Solange Olaria, direktora di SIGE, a splika ku e aña aki nan a traha mas ku 600 tas i a skohe pa enfoká riba alumnonan di skol di fundeshi. Di e manera aki ta traha riba motivashon di e muchanan, un poko mas trempan den nan karera eskolar. Banda di tas i material di skol, SIGE a yuda algun alumno tambe ku nan unifòrm. E inisiativa di SIGE ta un bon sosten pa mayornan ku no ta logra kubrí tur material di skol pa nan yunan.
Banco di Caribe ta aploudí SIGE pa nan dedikashon n’e proyekto ‘Duna un man na bo ruman’, ku kada aña ta hasi e alumnonan i nan famia kontentu i entusiasmá pa kuminsá e aña eskolar nobo. Ta deseá SIGE hopi éksito i forsa pa sigui ku e proyekto ku ta un kontribushon balioso na enseñansa di nos pais, un pilar importante pa futuro di nos muchanan.
