Resientemente Banco di Caribe a presensiá entrega di sertifikado di un trayekto di formashon pa mayornan organisá dor di Adventure Kids Curaçao Foundation. Durante 8 siman e fundashon a ofresé e proyekto ‘Family Foundations’ na mayornan ku ta buskando informashon pa komprondé e fasenan di desaroyo di nan yunan i siña abilidatnan útil pa guia nan yunan diariamente.
Tur siman tabatin un tayer ku a enfoká riba tópikonan manera planifikashon i presupuesto, kustumber di desaroyo, seksualidat, relashon entre mayor i yu, media sosial i trastorno serka mucha. Direktor di e fundashon Arian Hosepha huntu ku ‘Youth Life Coach’ Hayley Reinita i Ortopedago Yanieck de Wolff a presentá e tópikonan i a usa nan ekspertisio i konosementu komo sosten pa e mayornan.
E fundashon a keda lantá na aña 2017 i a bin ta organisá aktividatnan ku ta sostené mucha i hóben den nan desaroyo kognitivo, deportivo, abilidatnan sosial i ekspreshon. E meta prinsipal ta pa krea un ambiente sano na kas pa e mucha por sigui desaroyá i ekspresá su mes mas mihó posibel. Banco di Caribe semper a sostené proyektonan ku ta yuda hubentut den nan desaroyo. Mayornan tin un ròl hopi importante den esaki, konsiderando ku formashon di tur mucha ta kuminsá na kas. Proyektonan manera ‘Family Foundations’ ta ekipá mayornan ku hèrmèntnan nesesario pa komprondé nan yu den tempu moderno. Ta pe’sei Banco di Caribe ta aploudí e grupo di mayor ku a komprometé nan mes na e proyekto i a saka e máksimo for di kada tayer. Na klousura tur partisipante a reflekshoná, evaluá i menshoná e abilidatnan atkerí ku nan a kuminsá apliká na kas pa mehorá e relashon i komunikashon ku nan yu.
Banco di Caribe ta gradisí Adventure Kids Curaçao Foundation pa nan kontribushon na hubentut di Kòrsou i ta deseá e tim hopi éksito ku e proyekto ‘Summer Camp’ ku tin pendiente pa 2024.
