Djarason dia 7 di ougùstùs tabatin e promé reunion di trabou di direktiva di fundashon Ride for the Roses pa prepará pa e evento na kuminsamentu di otro aña. Esaki tabata tambe e promé reunion ku Benno van Leeuwen a presidí, kaminda a ratifiká e traspaso di presidensia di Robbin Martina pa Van Leeuwen. Por lo demas pa kontinuidat Robbin Martina por lo pronto ta keda forma parti di direktiva i aktualmente den e funshon di sekretario.
Den e promé reunion di trabou a repasá e puntonan di evaluashon di e último edishon di yanüari e aña aki, pa despues pone e promé pasonan komo preparashon pa e siguiente edishon di Ride, Walk, Swim i Sail for the Roses ku ta planiá pa djadumingu dia 26 di yanüari 2025. Den esei a wak tambe kon por inkluí elemento nobo pa hasi e evento pa rekoudá fondo mas atraktivo, tantu pa esnan bibá aki komo e bishitantenan. Na su debido tempu lo divulgá mas dato di esei. Den e reunion a trata e repartishon di tarea, miéntras ku a diskutí riba struktura di e fundashon pa halsa su efektividat. Sugerensia di otronan semper ta bonbiní na [email protected].
E meta primario di fundashon Ride for the Roses ta keda pa rekoudá fondo pa sostené fundashonnan ku ta atendé ku hende ku kanser, manera Fondo Prinsesa Wilhelmina. Ademas, otro propósitonan di e fundashon ta pa kibra ku e tabú, fasilitá edukashon i stimulá komunikashon riba e tópiko aki. Esei ta e kaso for di promé edishon di Ride na 2004 ku Orco Bank komo spònser prinsipal. Ride for the Roses ta determiná pa huntu ku Orco Bank i e otro partnernan perkurá pa e evento na 2025 ta un éksito atrobe.
