Di djaluna 26 di mei te ku djasabra 31 di mei Fundashon Kaya Kaya ta organisá un biaha mas Kaya Kaya Art Week. Kòrsou ta riku na arte i historia i Art Week ta duna oportunidat na tantu artistanan konosí i renombrá komo esnan mas hóben den e mundu di arte, e plataforma perfekto pa eksponé nan talento i kreashon. E siman di arte aki ta un momento úniko pa bishitantenan gosa di un selebrashon vibrante di kreatividat variá den kurason di Otrobanda. Durante Art Week lo tin tambe 2 kaminata Artwalkastry pa dia i djasabra 31 di mei lo tin Merkado Amor pa Otrobanda.
Art Week
Durante Art Week ta duna oportunidat na mas ku 42 artista lokal i internashonal pa eksponé nan obra di arte den 20 Kas di Arte. E kasnan di Arte ta repartí den Sebastopolstraat, Breedestraat, Frederikstraat, Belvederestraat, St. Thomas College i Kura Hulanda. Lo tin e.o. Arte Visual, Fotografia, Arte Digital, Literatura, Poesia, Tayer i hopi mas. Organisadónan di e evento ta premirá ku lo tin asina tantu arte pa mira ku bishitantenan mester tuma mas ku un dia pa disfrutá di e inmenso kreatividat artístiko ku Art Week ta brinda.
Open Mic
Ademas di eksposishon i benta di arte durante Art Week lo tin djaweps 29 di mei di 7’or pa 10’or di anochi ‘Open Mic’ na Anfiteater Jopi Hart. Lo tin oportunidat pa grandi i chikí deklamá poesia, konta chiste òf kuenta kòrtiku.
Tayer di Arte
Durante henter siman di Art Week por registrá pa partisipá na diferente tayer, ku un variashon di diferente tipo di arte. E tayernan lo tuma lugá na St. Thomas College den Hoogstraat i La Armada den Frederikstraat. Pa mas informashon di tur tayer, fecha, orario i lokalidat bishitá e páginanan sosial Kaya Kaya Festival.
Mural
Durante e kaminata por mira tambe muralnan den konstrukshon di artistanan Maaike Bijlsma, Bella Wonderlinch, Jeremy D Striker. Kaya Kaya ta gradisí tur 3 artista pa nan disponibilidat pa riba un base kompletamente boluntario pinta e muralnan, dunando asina mas koló i bida den nos kayanan di Otrobanda.
Artwalkastry
E kaminata Artwalkastry ta tuma lugá normalmente tur djaweps atardi. Pero durante Art Wweek lo tin 2 kaminata pa dia. Por skohe entre un kaminata 5.30 or di atardi òf esun di 7.30 or di anochi. E kaminata lo tin un durashon di mas o ménos 1,5 ora. Por registrá via www.kayakaya.org/artwalkastry òf e-mail [email protected] òf via medianan sosial Kaya Kaya Artwalkestry. Por paga on-line òf na ofisina di Kaya Kaya, Breedestraat pegá ku viadukto. Habitantenan di Kòrsou ta kontribuí ku XCG 35 i turista US$ 35, ku ta inkluí awa i refresko lokal i un shòt na Neto Bar. Ámbos kaminata ta inisiá tambe na ofisina di Kaya Kaya.
Merkado Amor pa Otrobanda
Djasabra 31 di mei, di 4’or di atardi pa 10’or di anochi lo tin e di sinku Merkado Amor pa Otrobanda, ku benta di kuminda, bebida, arte i un variashon di produkto. Lo tin tambe área pa mucha i ambiente musikal. E merkado ta tuma lugá den área di viadukto i kayanan den besindario. Durante Art Week, di djárason 28 di mei pa djabièrnè 30 di mei, di 6’or di atardi pa 10’or di anochi por pruf tambe e loke diferente bendedó entusiasmá ta brinda.
Fundashon Kaya Kaya ta gradisí tur partner ku a kolaborá pa hasi Art Week posibel. Un danki spesial ta bai na nos spònser i fondonan prinsipal manera Aqualectra pa iluminá e ruta i semper ta kolaborá den diferente forma ku Kaya Kaya, AVF, ku ta pone fèrf disponibel pa tantu Art Week, tur mural i proyektonan ku ta enserá fèrfmentu i tambe MCB Curaçao, Fonds voor Cultuurparticipatie, Cultuurfonds Caribischgebied, Monumentenzorg, Ministerio OWCS i Nu Capital.
Kaya Kaya ta invitá pueblo di Kòrsou kompletu pa bin selebrá ku nos un siman di arte espektakular i alabes kontribuí ku nos empresarionan lokal ku ta ofresé kalidat, kreatividat, variashon i inovashon.
Bishitá, Like i Share nos páginanan sosial di Kaya Kaya via Instragram i Facebook: Kaya Kaya Festival, Art Kaya Kaya, Kaya Kaya Artwalkestry, Amor pa Otrobanda, pa mas informashon tokante e artistanan i nan arte, programashon di tayer, mapa i guia pa kana durante Art Week, kaminata Artwalkestry i Merkado Amor pa Otrobanda.
