Bista positivo di e sektor turístiko durante reunion pa miembronan di CHATA

0
3

Durante e di dos reunion pa miembronan di Curaçao Hospitality and Tourism Association (CHATA) i di su direktiva, e president di CHATA, Mimi Luttge, kende a duna un palabra di apertura, i diferente oradó, a duna presentashonnan inspirativo pa ku desaroyonan den e sektor di turismo na Kòrsou. E proyekshonnan ta hopi positivo, kaminda por mira un kresementu signifikante den kapasidat di kamber di hotèl, kantidat di turista i buelonan internashonal.

Segun Anuschka Cova, Direktor nobo di CHATA, e impakto ekonómiko di turismo na Kòrsou ta indudabel. Por mira esaki tambe na e kantidat di kamber di hotèlnan den konstrukshon i turistanan ku ta subiendo kada luna. Esaki ta demostrá konfiansa di invershonistanan, i tambe di e potenshal di e sektor turístiko. Cova ta pone ènfasis riba e impotansia di kolaborashon di e sector, gobiernu i tambe e invershonistanan. ‘Nos mester uni pa asina garantisa training i ènfoká riba nos servisio, human capital i infrastruktura’ Cova a èkspresá. Esaki un biaha mas a keda demostrá dor di estudionan hasí dor di Banko Sentral di Kòrsou Sint Maarten (CBCS) ku Candice Henriquez a presentá, ku e impakto ekonomiko di turismo ta indiskutabel. Muryad de Bruin, Direktor di Curaçao Toeristenbureau (CTB), ta konfirmá esaki i a indiká ku nan lo kontinuá ku aktividatnan di merkadeo di Kòrsou den merkadonan internashonal. E ta enfatisá si e importansha di treining i edukashon kontinuo di e personal den e sektor, pa asina turistanan por tin un mihó eksperensha durante nan estadia na Kòrsou. Peggy Croes, Senior Vice President di Curaçao Airport Partners (CAP), a presentá e buelonan proyektá pa e aña binidero. Aki tambe por a mira un kresementu signifikante kompará ku añanan anterior. Nan ta konsiente di e retonan logístiko ku tin na aeropuerto, i a indiká di ta trahando na esei. Michelle Metsch di Downtown Management Organization (DMO) a duna un presentashon tokante plannan konkreto pa transformashon di Punda. Pa logra tur e plannan aki, ta nesesario pa haña sosten (finansiero) di pueblo henter, sektor privá i tambe di gobièrnu, pa asina logra ku Punda ta bira un atrakshon turístiko atrobe pa nos mes i pa nos turistanan.

Den sèptèmber próksimo CHATA lo organisá su siguiente reunion pa asina por sigui komuniká desaroyonan pa ku e sektor turístiko. Adishonalmente, CHATA a anunsia orguyosamente ku nan ta stimulá studiantenan pa hasi nan studio den e sektor di hospitalidad. Komo gésto, CHATA ta komprometé i ofrese dos ‘scholarship’ di hospitalidad na dos studiante di University of Curaçao. Studiantenan, Kyziah Werleman i Clarice Kerindongo a wordu sorpresá ku e bon notisia awe. Varios presentashon a ènfatisá e importansia di rekurso humano. E CHATA HR TaskForce a wordu establese i dirigi dor di Simone Garbelmann. E mensahe ta ‘duidelijk’, nos ta sigui krese ku un bista riba desaroyo sostenibel. CHATA ta sigui traha ku gobiernu, su miembronan i otro invershonista pa protehá e pilar mas grandi di nos ekonomia.

Tambe CHATA a dunaun bon biní na 10 miembro nobo, i otro luna lo risibi 5 miembro nobo mas. CHATA lo organisa su siguiente Membership Meeting den September i lo sigui informá su miembronan di e desaroyonan relevante na e sektor di turismo.  CHATA ta yama danki na tur su sponsernan, MCB, Building Depot i Curaçao Marriott Beach Resort.

LEAVE A REPLY

Please enter your comment!
Please enter your name here