Ofisina di Turismo di Kòrsou (CTB) den kolaborashon ku Curaçao Airport Partners (CAP), Curaçao Hospitality & Tourism Association (CHATA) i Curaçao Airport Holding (CAH) ta anunsiá ku orguyo ku e aerolínea di mas grandi den Latino Amérika kual ta LATAM Airlines lo inisiá un buelo nònstòp entre Lima, Peru i Kòrsou entrante 2 di desèmber 2025. E buelo lo keda operá 3 biaha pa siman riba tur djamars, djabièrnè i djadumingu. E buelo nobo lo sirbi komo un hub importante pa Kòrsou por sigui ekspandé den region di Sur Amérika mehorando e konekshon no solamente ku Peru pero tambe ku Argentina, Brazil, Chile, Uruguay i Paraguay.
E skema di buelo ta di e siguiente manera:
| Ruta | Salida | Yegada |
| Jorge Chávez International Airport (LIM) – Curaçao International Airport (CUR) | 12:00 | 17:40 |
| Curaçao International Airport (CUR) – Jorge Chávez International Airport (LIM) | 18:45 | 22:25 |
E konekshon nobo di LATAM lo hasi posibel pa Kòrsou atraé i risibí biaheronan for di merkadonan importante manera Lima, Buenos Aires, Santiago de Chile, Asuncion, Cordoba, Montevideo i Mendoza. Lokual ta representá un gran oportunidat pa mas turista for di region di Sur Amérika bin eksperensiá Kòrsou su produkto turístiko riku. For di un variedat amplio di akomodashon te na diferente atrakshon turístiko, playanan bunita, deportenan akuátiko, kultura vibrante, eventonan i mas ku tur kos e kaluroso hospitalidat di e habitantenan di Kòrsou.
Di otro banda, e ruta nobo lo nifiká tambe mas opshon di biahe i mihó konekshon pa pueblo di Kòrsou, tantu pa esnan ku ta biaha pa vakashon òf pa hasi negoshi.
