Minister Javier Silvania di Salubridat, Medio Ambiente i Naturalesa a inisiá e proyekto di Restrukturashon di Kuido Mental, bou di e nòmber Herstructurering Geestelijke Gezondheidszorg (GGZ). Un di e ophetivonan di e proyekto aki tabata pa establesé un Servisio Sentral di Krísis di GGZ (Centrale Crisisdienst GGZ) ku ta disponibel pafó di orario di ofisina. Entretantu, Centrale Crisisdienst GGZ ta operashonal i ta disponibel riba dianan di trabou i durante wikènt di 5’ or di atardi te 11 ‘or di anochi, esaki teniendo kuenta ku mayoria kaso agudo ta tuma lugá durante e orarionan aki.
E meta di un servisio di krísis den kuido mental ta pa duna asistensia inmediato i efisiente na personanan ku ta den un situashon di krísis síkiko. Esaki ta inkluí personanan ku ta sufri bou di un estado síkiko grave, ku tin pensamentunan di suisido òf ku ta den otro tipo di situashonnan ku ta rekerí yudansa inmediato. Intermediashon profeshonal inmediato ta esensial pa prevení òf limitá dañonan emoshonal, físiko òf mental i pa restablesé seguridat di e persona afektá i su ambiente.
Den sierto kaso, ta nesesario pa interná e pashènt den un instansia di kuido denter di 24 pa 48 ora pa prevení rísikonan di salú inakseptabel, komplikashonnan médiko òf konsekuensianan serio pa e persona i su entorno. E situashonnan aki ta enserá personanan ku no por keda nan kas na un manera seif i ku mester risibí kuido inmediato.
Centrale Crisisdienst GGZ ta un kolaborashon entre PSI-Skuchami (ku ta kordiná e servisio sentral di krísis), Klinika Capriles, Verslavingskliniek Brasami i Fundashon pa Maneho di Adikshon (FMA). E servisio ta operá for di PSI-Skuchami na Otrobanda (Van Leeuwenhoekstraat 28A) i ta traha di aserka ku instansianan manera, Korps Polisial di Kòrsou (KPC), Fundashon Kuido di Ambulans Korsou (FKAK), Dòkternan di kas, Huisartsenpost (HAP), CMC i otro instansianan di kuido.
Instansianan rekonosé, manera KPC, FKAK, CMC, HAP, dòkternan di kas i sikiaternan independiente, por tuma kontakto direkto ku Centrale Crisisdienst GGZ. Den kaso di un situashon urgente, komunidat mester tuma kontakto ku KPC, un dòkter di kas òf HAP, ku na nan turno lo embolbí Centrale Crisisdienst GGZ, si ta nesesario.
Anteriormente, kada instansia, esta PSI-Skuchami, Klinika Capriles, Brasami i FMA, tabatin nan propio servisio di asistensia di krísis. Pa falta di kordinashon sentral i uniformidat den maneranan di operá, hopi biaha no tabatin un kolaborashon efisiente, loke tabata kousa listanan di espera largu pa pashèntnan i organisashonnan envolví (manera KPC, FKAK i dòkternan). Den algun kaso no tabata posibel pa haña un solushon adekuá pa e situashon di krísis.
Ta di sumo importansia pa tur organisashon envolví sa eksaktamente ken nan mester tuma kontakto kuné den kaso di un situashon di emergensia mental i ku Centrale Crisisdienst GGZ por garantisá un bon kordinashon i un proseso di interná rápido pa pashèntnan ora ku esaki ta nesesario. Tur instansia di kuido mester kolaborá pa sigurá ku, si un pashènt tin mester di keda interná, esaki por tuma lugá na tempu.
E triagistanan di Centrale Crisisdienst GGZ a risibí preparashon serka un instituto spesialisá i ta operá segun protokòl di triage di GGZ, meskos ku esaki ta apliká na Hulanda. Si ta nesesario, e triagistanan ta konsultá ku un sikiater na warda, por ehèmpel di Klínika Capriles, pa evaluá e situashon i determiná kua tipo di intervenshon ta nesesario na e momentu ei.
Instansianan importante, manera KPC, FKAK, CHV (Curaçaose Huisartsenvereniging), HAP, CMC i Inspekshon di Salubridat, a risibí mas informashon detayá tokante e ophetivonan i e komienso di Centrale Crisisdienst GGZ. Lo tene keda den kontakto kontinuo ku e organisashonnan aki pa periódikamente evaluá i mehorá funshonamentu di e servisio.
Ku e lansamentu di Centrale Crisisdienst GGZ, Kòrsou a realisá un logro signifikante den kuido di salú mental na Kòrsou.
