Despues di un trayekto intensivo por bisa ku Courtyard by Marriott Curaçao ta den su fase final, di manera ku pronto por habri su porta. Durante di e último lunanan a bin ta traha duru pa krea i duna formashon na un tim ku pa 90% ta konsistí di hende lokal. Na e momentu aki ta kompletá entrenamentu di e tim riba diferente ekspertisio dor di profeshonalnan lokal i internashonal di manera ku tur hende ta kla p’e apertura.
Ademas di un tim ku pa gran parti ta reklutá lokalmente, mester menshoná ku den fase di konstrukshon tambe a fokùs riba kolaborashon ku empresa- i provedornan lokal, ku e meta pa kontribuí mas tantu ku ta posibel na desaroyo ekonómiko di nos pais.
Banda di esaki, gerensia i e tim lokal di propietario a pensa durante desaroyo di e konsepto pa e Courtyard nobo aki tin e fushon entre e hotèl i e nesesidatnan di nos industria turístiko na Kòrsou, di manera ku por integrá elementonan lokal. Asina por menshoná ku a usa diferente artista lokal pa krea arte i mural ku ta keda ekshibí den áreanan komun i den salanan di reunion. Tambe, tur sala di evento a risibí un nòmber lokal. E restorant ku lo bin den e hotèl ta apropiá pa e públiko empresarial lokal, i lo traha huntu ku músikonan lokal pa forma e iterinario di evento. Di akuerdo ku gerensia, “Courtyard lo bira e sitio den Otrobanda pa un ‘get-together’ òf ‘staycation’ den kurason di nos siudat p’e públiko lokal, i bishitantenan di nos isla.”
Courtyard by Marriott Curaçao ta un proyekto di propiedat lokal, ku sosten di akshonistanan Stichting Vidanova Pensioenfonds, Stichting Particulier Fonds Otrobanda i Foundation Pension Fund Isla Curaçao. Nan ta pèrkurá ku rais dje hotèl ta bon ankrá den balornan i espektativa di nos pais. E hotèl, situá den área di Rif dilanti di e terminal di krusero i Mega Pier, lo ofresé 152 kamber moderno, i tambe un área komersial pa tienda i restorant. E fasilidatnan a wòrdu diseñá pa kumpli ku nesesidatnan di tantu e turista ku ta bishitá nos pa rekreá i esun ku ta bin pa hasi negoshi. Ta inkluí un pisina, un gym i un variashon di restorant ofresiendo diferente setting i spesialidat.
Den antisipashon pa apertura di Courtyard a tene diferente ‘job fair’ i kampaña di solisitut na Kòrsou, esaki sigur a kontribuí na un interes grandi di parti públiko lokal pa apertura di e hotèl. Ademas, e hotèl a bin ta sostené diferente proyekto lokal, entre nan inisiativanan dirigí riba e desaroyo di e área di Rif, donashon na trabou boluntario di Birgen di Rosario, programanan edukashonal na diferente skol i kolaborashon ku empresarionan lokal pa huntu drecha e infrastruktura turístiko.
“Nos kompromiso ku inklushon lokal, nos karakter internashonal i e hospitalidat kaluroso di Kòrsou lo distinguí nos komo un destinashon hotelero lider na Kòrsou. Tantu pa nos huéspetnan internashonal i tambe esnan lokal”, esaki di akuerdo ku Ernst van Zutphen, General Manager di Courtyard by Marriott Curaçao. “Nos ta entusiasmá p’e dia di apertura na unda nos lo yama bon bini na tur bishitante lokal i esnan di henter mundu.” Apertura di Courtyard by Marriott na Kòrsou lo tuma lugá pronto. Sigui e retnan sosial di Courtyard by Marriott Curaçao pa mas informashon i pa e fecha di apertura.
