Despues di a finalisá un invershon di 40 mion dòler pa e renovashon, na fin di 2019 Curaçao Marriott Beach Resort a habri pa su wéspetnan – apenas algun luna promé ku yegada di e pandemia di COVID-19. Apesar di e retonan inmediato ora djis despues mundu kompleto a klap sera, e tim dje hotèl a perseverá, a bende e kambernan na un manera stratégiko i a redusí e gastunan operashonal. Despues di un rekuperashon fuerte e tim a sera 2024 ku orguyo selebrando e di-sinku aniversario.
“E tremendo anfitrionnan di Curaçao Marriott Beach Resort no por a premirá loke tabata den tapara despues di nos reapertura grandi – di e momentonan mas abou te na e momentonan mas haltu ku nos a selebrá e aña aki”, Rachel Cronmiller, Manager di Merkadeo di e hotèl a bisa. “Nos tim mester a konfia tantu riba nos stratégia di empresa komo nos resepshon kaluroso pa perkurá no solamente ku e empresa aki lo a sobrebibí, pero tambe pa e prosperá. E último sinku añanan a sirbi komo prueba di firmesa di nos personal, e bunitesa di nos edifisio i e rekomendashon i referensinan di nos wéspetnan di promé ora na otronan, pa kua nos ta enormemente gradisido na nan”.
E selebrashon di e di-sinku aniversario di e hotèl a enserá un resepshon ku wéspetnan ku a gosa di artista lokal, músika bibu, i klaro tambe di bolo i zjampaña. Ademas, e hotèl a brinda un tarifa spesial “staycation” pa e poblashon lokal di nos isla. Awor ku 2024 ta yegando na fin e hotèl ta sigui selebrá ku e aña e por a risibí mas ku 185.000 wéspet i ban wak ki posibilidatnan 2025 lo trese. E tim ta ilushoná e selebrashon di e di-dies aniversario na 2029 i tur kos ku lo sosedé entre awor i e e fecha ei.
Riba potrèt: Gerente di Rekurso Humano Tirza Garmes ta brinda ku zjampaña na okashon di selebrashon di e di-sinku aniversario di Curaçao Marriott Bech Resort, ku banda di dje Yael Victorio, Gerente di Food & Beverage.
