Kòrsou ta dal un paso grandi den stimulashon di inovashon i mundu empresarial ku lansamentu di Blue Harbour City Curaçao, un kampus di negoshi nobo pa startups i scale-ups. E inisiativa aki, desaroyá den kolaborashon ku Curinde, ta ofresé un ambiente di trabou dinámiko i fleksibel kaminda kompanianan yòn por krese, inová i ekspandé internashonalmente.
E akuerdo entre e dos kompanianan a keda firmá pa Gerente di Curinde, sra. Jacqueline Jansen i Gerente di Blue Harbour City Sra. Signalda Vrutaal. E firmamentu a tuma lugá den presensia di Minister di Desaroyo Ekonómiko ing. Charles Cooper.
Ku introdukshon di sektornan manera FinTech, AgroTech, GovTech, Ekonomia sirkular i logístika duradero, Blue Harbour City ta respondé riba e nesesidat kresiente pa un hub di negoshi inovativo. E kolaborashon ku Curinde, un kompania rekonosé den maneho di zona liber i terenonan industrial, ta duna un impulso stratégiko pa pone Kòrsou riba mapa komo un lokalidat di inovashon regional. Esaki ta un inisiativa ku ta kuadra kompletamente den e maneho di MKB di Ministerio di Desaroyo Ekonómiko (MEO).
Un ekosistema pa kresementu i inovashon
“Dor di uni nos konosementu, nos ta krea un ambiente kaminda empresarionan inovativo ta risibí e espasio i e medionan nesesario pa desaroyá nan negoshi,”palabranan di Signalda Vrutaal, Ko-fundadó i direktor general di Blue Harbour City Curaçao.
“Nos no ta ofresé solamente espasio físiko pa trabou, pero tambe aksesibilidat na un ret amplío di finansiadónan, mentòrnan i partnernan di negoshi.”
Blue Harbour City Curaçao ta ofresé un surtido amplio di fasilidatnan, inkluyendo:
- Espasio di trabou fleksibel, atelier i salanan pa reunion diseñá pa negoshinan inovativo.
- Aksesibilidat na eventonan di networking i guia pa yuda e empresario den su kresementu.
- Un kampus di negoshi inovativo ku ta stimulá un ambiente di trabou internashonal i moderno.
Finansiamentu i sosten pa empresarionan; Seshon finansiero tur luna
Un di e retonan mas grandi pa ‘startups’ i ‘scale-ups’ ta haña finansiamentu. Pa e motibu aki, Blue Harbour City ta organisá seshonnan finansiero tur luna, un evento interaktivo kaminda empresarionan por direktamente papia ku invershonistanan i finansiadónan.
“Hopi empresario ta enkontrá difikultat pa atraé kapital, pasobra e rutanan tradisional di fiansa no ta semper aksesibel òf adaptá na nan nesesidat,”
“Ku e seshon finansiero, nos ta pone e empresarionan den kontakto direktamente ku e partido korekto i yuda nan mehorá nan ‘business case’.” palabranan di Sra. Vrutaal.
Durante e seshonnan finansiero, empresarionan no solamente ta haña e oportunidat pa atraé finansiamentu, sino tambe konosementu balioso tokante kiko invershonistanan ta buska den un negoshi.
Kòrsou komo hub di inovashon den region
Ku e lansamentu di Blue Harbour City Curaçao, Curinde i Blue Harbour City ta duna un paso esensial den kreashon di un klima di negoshi sostenibel i resiliente.
“Empresanan i inovashon ta krusial pa e kresementu ekonómiko di Kòrsou. Dor di invertí den e campus di negoshi aki, nos ta fortalesé e klima di invershon i nos ta posishoná e isla komo un hub atraktivo pa negoshinan inovador den region,” palabranan di sra. Vrutaal.
Tuma parti i yuda forma e futuro di negoshi na Kòrsou!
Bo ta un empresario ku ideanan inovativo i bo ta buska e medio ambiente korekto pa krese? Òf bo tin interes den posibilidatnan di finansiamentu via nos seshon finansiero?
Tuma kontakto ku Blue Harbour City Curaçao via [email protected] i deskubrí kon nos por sostené bo.
Ku e inisiativa aki Kòrsou ta posishoná su mes riba mapa komo un sentro di inovashon internashonal i regional, kaminda startups i scale-ups por risibí tur sosten pa prosperá.
