Curaçao Industrial and International Trade Development Company (Curinde) i SCMT Energy a firma un Memorandum of Understanding (MOU) pa desaroyá e promé planta di produkshon di bateria SCMT den Karibe. E akuerdo históriko aki ta un paso fundamental pa establesimentu di un fasilidat na Kòrsou, mehorashon di e paisahe industrial di nos isla i promoshon di solushonnan di energia sostenibel.
A firma e Memorandum of Understanding den presensia di Minister di Desaroyo Ekonómiko di Kòrsou, Sr. Ruisandro Cijnte, kende a ekspresá un sosten firme pa e empresa inovativo akí den nos Zona Ekonómiko manehá pa Curinde. E partidonan ku a firma tabata representá pa Sr. Samuel Kang, CEO di SCMT Energy, i Sra. Jacqueline Jansen, CEO di Curinde.
Sr. Kang a deklará: “Pa medio di nos relashonnan ku Caltech-incubated Sienza Energy, i un sosten firme di gobièrnu di Kòrsou, nos lo produsí bateria di klase mundial na Kòrsou.”
Sr. Kang ta un alto ehekutivo anterior di BYD i Chief Operation Officer di Sienza Energy.
SCMT Energy ta komprometé pa ofresé bateria rekargabel di e kapasidat i densidat di energia di mas haltu na mundu pa vehíkulonan eléktriko, almasenamentu di energia (ESS) i produktonan eletróniko pa konsumidó. Su dedikashon na sostenibelidat ambiental ta demostrá pa medio di su produkshon di bateria di litio ekológiko, ku ta redusí kostonan di produkshon i e impakto ambiental signifikativamente.
Establesimentu di e planta di bateria di SCMT Energy na Kòrsou ta un primisia pa Karibe; ya ku lo e ta promé pa eksportá prinsipalmente pa e merkadonan di Europa, Karibe i Latinoamérika, miéntras ku lo e sirbi tambe e merkado lokal.
E kolaborashon ta suprayá e kompromiso di Curinde i SCMT pa promové kresementu industrial sostenibel i inovashon na Kòrsou.
