Dutch Caribbean Air Navigation Service Provider (DC-ANSP) a alkansá un logro importante. Djabièrnè dia 23 di mei Minister Charles Cooper di VVRP i Micilia Albertus-Verboom direktor general di DC-ANSP a inisiá ofisialmente e konstrukshon di un edifisio operashonal nobo banda di e ofisina prinsipal di DC-ANSP na Seru Mahuma.
E edifisio nobo ta nifiká un invershon importante den infrastuktura di DC-ANSP. E edifisio ta haña espasio mesora banda di e aktual ofisina prinsipal i ta bai hospedá e Area Control Center (ACC), ekipá ku e sistemanan mas moderno di kontròl di tráfiko aéreo. Aki lo implementá tambe e teknologia inovativo di Remote Tower di moda ku ta bira posibel pa sentralisá e servisio di e kontròl di tráfiko aéreo pa mas ku un sitio – e toren di tráfiko di Hato Airport na Kòrsou i den futuro tambe e toren di tráfiko na Flamingo Airport na Boneiru. Ademas, lo ubiká e departamentu di Aeronautical Information Management (AIM) ku suministro di informashon i publikashonnan di aviashon den e sentro nobo.
“E edifisio aki ta muchu mas ku djis un ekspanshon físiko. E ta un paso importante den direkshon di solushonnan pa servisio moderno di tráfiko aéreo, dirigí riba futuro”, segun direktor general Micilia Albertus-Verboom. “Ku e invershon aki DC-ANSP ta reforsá su posishon den aplikashon di teknologia avansá di aviashon.
DC-ANSP ta demostrá di ta kla pa futuro enfokando kontinuamente riba duna servisio di aviashon di kalidat haltu i teniendo kuenta ku kresementu di tráfiko aéreo regional.
Enkuanto DC-ANSP
DC-ANSP ta duna servisio di kòntròl di tráfiko aéreo. E ta responsabel pa guia avionnan dentro di e área di informashon di buelo (“vluchtinformatiegebied”) di Kòrsou i ta perkurá pa un proseso seif pa aterisahe i salida di avionnan na i for di Kòrsou i Boneiru. DC-ANSP ta responsabel tambe pa duna servisio di komunikashon, nabegashon i posishonamentu (CNS) i pa emití informashon i publikashon aeronáutiko (AIM) pa e seis islanan di Karibe Hulandes. DC-ANSP ta duna entrenamentu pa servisio di tráfiko aéreo (ATS) komo un organisashon di entrenamentu sertifiká, Tambe e ta duna formashon di AIM i CNS. DC-ANSP ta un miembro ‘Bronze’ di ICAO TRAINAIR PLUS.
E ophetivo primario di DC-ANSP ta pa ofresé servisio di tráfiko aéreo seif, efisiente i bon pa medioambiente. Ta alkansá esaki implementando teknologia inovativo i promoviendo koperashon ku stakeholdernan den e industria di aviashon.
DC-ANSP ta manehá tres fasilidat di kòntròl di tráfiko aéreo: un Area Control Centre na Kòrsou (Mahuma) i dos toren di aeropuerto, unu na Curaçao International Airport (Hato Control Tower) i unu na Bonaire International Airport (Flamingo Control Tower).
Mas informashon tokante DC-ANSP por haña na: https://dc-ansp.org/
