Minister Charles Cooper huntu ku e Servisio di Planifikashon Urbano (ROP) a otorgá ofisialmente un pèrmit di konstrukshon na Grand Hill B.V. pa konstrukshon di bibienda pa nos grandinan na Korsou.
E proyekto di Grand Hill B.V ta konsistí di 48 bibienda pa nos grandinan ku ta apto pa tur fase di nan bida. Residente por biba tantu independiente komo ku sosten, guia i kuido dor di un equipo profeshonal.
Lo bai tin un restaurant, un salon di beyesa, un praktika di fisiotherapia I hopi mas. Grand Hill Resort ta stimulá interkambio sosial, inter-generashonal i un sensashon di komunidat bou di hende grandi. Tur esaki ta tuma lugá den e bario di Chango.
E proyekto aki ta marka un kontribushon signifikante riba tereno sosial dor di stimulá e sektor ekonómiko i kreá oportunidat di trabou. Atraves di servisionan i fasilitatnan amplio, e proyekto lo ofresé varios oportunidat di trabou den sektor di kuido, horeka, limpiesa, i funshon administrativo. Tambe lo bai tin kreashon di trabou durante e fasenan di konstrukshon.
Minister Charles Cooper a ekspresá di ta kontentu ku e proyekto di Grand Hill pasombra e ta enfoká riba mas bibienda pa e banda Oost di nos isla pa e grupo spesífiko aki di hende grandi. Minister ta konvensí ku esaki lo bai duna èkstra impulso na nos isla. Ku e konstrukshon ta konta ku un invershon di 15 mion, i lo wòrdú terminá na aña 2025.
