Resientemente Minister di ESKD sr. Sithree van Heydoorn a hasi desvelo di nòmber nobo pa Fundashon Kuido Infantil Sta. Maria. E nòmber nobo ta AKOHIDA PA MUCHA THERESITA (serka Theresita, Bo Yu Ta Nos Yu). Esaki ta na honor di e fundador sra. Gertrudis Theresita Calister Petronia. Tambe e maestro di seremonia a duna di konosé ku e aña aki na novèmber e Akohida Pa Mucha Theresita ta kumpli 50 aña di eksistensia.
Durante di e aktividat Pastor C. Meris a bendishoná e fundashon i para ketu na e trabou boluntario ku a kuminsá dor di Iglesia Katóliko huntu ku sra. Theresita. Direktiva, lider, mayor i muchanan huntu a mustra nan apresio pa sra. Gertrudis Theresita C. Petronia den un produkshon di video, kantika dor di e muchanan i mas. Minister di ESKD sr. S. van Heydoorn a tene un diskurso elokuente kaminda e la gradisí sra. Theresita pa su aporte balioso na komunidat di nos pais. Tambe e la elaborá riba e echo ku a subi supsidio pa kuido pre-eskolar i tambe a indiká ku huntu ku e direktor di sektor di Kultura i Deporte sra. Lizette Sambo ta trahando riba mas pa nos muchanan di pre-eskolar.
Ministerio di ESKD ta felisitá e fundashon, direktiva, lider, muchanan i mayornan ku e bunita aktividat aki i ta gradisí kada un pa nan bunita aporte na desaroyo di nos muchanan.
