Preparashonnan pa e di 11 edishon di Curaçao International Film Festival (CIFF), ku lo tuma lugá di 9 pa 13 di aprel e aña aki, ta den pleno marcha. E edishon aki ta primintí di ta un festival spesial, den kual e organisacion ta trese bèk arte ‘perdi’ lokal i internashonal riba paña blanku den forma di pelikula, fragmentonan di televishon, potrèt i pintura.
Komo parti di e segmento di ‘Lost & Found’, a organisá un kompetensia pa i ku Landhuis Bloemhof entre pintornan lokal pa duna nan propio interpretashon na e pènel pèrdí di Rembrandt, ku ta deskribí e sentido di smak Un dokumental kòrtiku lo wòrdu trahá di e ganadó, ku lo wòrdu mustra durante e CIFF25.
Ademas e programa Caribbean Focus ku a introdusí aña pasá lo bira un parti permanente di e festival. E aña aki, no ménos ku 26 inskripshon a risibí, di kua un selekshon lo wòrdu mustra durante e festival. “Ta remarkabel pa mira ku e industria di pelíkula na eskala chikí pero kreativo na Kòrsou i e region a sigui krese i desaroyá aña tras aña den e último añanan,” Michael Elias, direktor di CIFF a bisa “E nivel di entrega lokal i regional ta haltu, i tin algun joya real entre nan ku lo bria na e festival di e aña aki.”
Un di e puntonan mas importante di e aña aki ta un dokumental konmovedor i impreshonante tokante e boto shuttle – Isidel 1 – ku a disparsé sin rastro entre Boneiru i Kòrsou. Ademas, e pelíkula bon bishitá Kombiná na Hulanda, tokante e famoso arkitekto Lyongo Juliana, tambe ta parti di e programashon.
E aña aki e festival lo kolabora un biaha mas ku Orkesta Hubenil Kòrsou, dirigí pa Dennis Aalse. Nan lo un biaha mas interpretá músika di pelíkula ku ta kuadra sin problema ku pelíkulanan mundialmente famoso i kompositornan internashonal.
E Premio Yellow Robin lo wòrdu presentá atrobe durante CIFF 2025. Den kolaborashon ku Morelia Film Festival na Mexico, aktualmente e organisashon ta selektando 5 pelickula di cineastanan prometedor di Latino America y Caribe, ku tin chèns di gana e premio prestigioso aki. E ganadó lo pasa su pelíkula na Morelia Film Festival 2025 na Mexico i na Film by the Sea 2025 na Hulanda, i tambe lo risibí un premio kèsh pa un programa edukativo òf komo kontribushon na un produkshon nobo. Loke ta spesial e aña aki ta ku Daniela Michel, direktora di Morelia Film Festival, lo ta den e hurado i tambe lo ta presente na e di 11 edishon di CIFF.
Jan Doense, direktor di e festival Film by the Sea, komo spesialista den e genero di teror, lo mustra dos pelikula aklamá ku un masterclass akompañante.
Meskos ku aña pasá, henter e produkshon di e festival ta den man di un team lokal na Kòrsou. E organisashon i kordinashon di e vários komponentenan di e programa ta wòrdu dirigí pa Sulin Passial, i e agensia lokal di merkadeo Factory360 Marketing ta sòru pa e promoshon rondó di e festival. Lo anunsiá e programa final di e di 11 edishon di e Festival Internashonal di Pelíkula Kòrsou meimei di mart.
