Despues di un promé edishon éksitoso di ‘Global Money Week’ na Kòrsou den 2024, tur kos ta klá pa e edishon 2025! Global Money Week ta un moveshon di konsientisashon mundial ku ta keda organisá tur aña pa OECD (Organisation for Economic Co-operation and Development). E aña akí Global Money Week ta tuma lugá di djaluna, 17 di mart te ku djaweps, 20 di mart 2025 – den kuadro di elekshon aki na Kòrsou e djabièrnè, 21 di mart ta kai afó. Global Money Week ta keda organisá un biaha mas pa Pichiri – Sabí ku sèn, un inisiativa lokal ku tin komo meta pa mehorá konosementu finansiero bou di nos komunidat.
Skol di Plaka Sessions: Workshòp grátis pa alumnonan di skol sekundario.
E aña aki tambe e enfoke ta riba e importansia pa desaroyá e konosementu finansiero bou di nos hóbennan. Durante un lès interaktivo ‘Skol di Plaka Session’ e mèntornan di Pichiri ta siña alumnonan di skol sekundario kon pa manehá nan sèn di forma konsiente i alabes kon pa tuma mihó desishon ora ta trata sèn i aspektonan finansiero. ‘Skol di Plaka Sessions’ ta desaroyá spesialmente pa alumnonan di ‘bovenbouw’ na skolnan sekundario. E lema ta keda: ‘Learn. Save. Earn’, pues ku otro palabra: Siña.Spar.Gana.
Registrá bo klas awe mes!
Kada ‘Skol di Plaka Session’ tin un durashon di 45 minüt. Pa por duna oportunidat na mas tantu skol posibel, por hasi solamente un inskripshon pa klas. E dosente òf representante di skol ku ta hasi e inskripshon mes por skohe e orario deseá.
Skolnan por registrá mas ku un klas i e tim di Global Money Week i Pichiri – Sabí ku sèn lo purba pa akapará tur inskripshon ku drenta. Den kaso ku e kantidat di inskripshon ta muchu mas tantu ku e mèntornan disponibel, e preferensia lo ta pa duna mas tantu skol posibel e
oportunidat pa eksperensiá ‘Skol di Plaka Sessions’ durante Global Money Week 2025.
Un yamada i invitashon na tur dosente, kabes di skol i/òf representante di skol pa inskribí boso klas awe mes via di nos wèpsait: www.pichiri.cw/global-money-week. Por inskribí te ku djamars, 4 di mart 2025.
Pichiri – Sabí ku sèn: nos ta traha muchu duru pa nos ta bashí!
www.pichiri.cw
