Resientemente Digicel Kòrsou a risibí bishita di Tim di Maneho di Krísis di Kòrsou (CRBo), i tambe Promé Minister sr. Gilmar Pisas. E bishita aki tabata masha partikular i a regardá un tèst ku un sistema di alarma nashonal den kuadro di krísis i kalamidat. Den presensia di Promé Minister Gilmar Pisas a ehekutá e promé tèst ofisial na ofisina prinsipal di Digicel na Biesheuvel.
Durante di e último lunanan un ekipo grandi konsistiendo di ekspertonan di Digicel Kòrsou, Digicel Group i RAC a bin ta traha huntu riba un ‘cell broadcasting system’. E sistema aki ta manda un mensahe di alarma via telefòn pa tur persona ku ta den un área spesífiko òf si ta nesesario pa henter pais den kaso di kalamidat manera kandela, temblor, tsunami, huma tóksiko, ‘amber alerts’ similar na Merka (esaki ta ora un mucha ta kore peliger òf a keda sekuestrá.) E ‘cell broadcasting’ ta forma parti di sistemanan pa alarmá i alertá públiko ‘early warning system’ ku tambe otro paisnan tin manera ‘Presidential announcements’ na Merka òf ‘NL- alert’ na Hulanda. E mensahe ta wòrdu entregá den 1 pa 1,5 sekònde. E sistema lo pusha e mensahe kada 30 sekònde pa telefònnan den e área selektá den e periodo di tempu selektá, p.e. pa 10 minüt, òf vários ora. Ademas, por manda e mensahe den diferente idioma konsiderando ku nos tin un komunidat ku ta konsistí di diferente nashonalidat i ta multilingual.
Resultadonan di e tèst ta krea base pa por sigui hasi e preparashonnan nesesario, traha riba e maneho i e kuadro legal pa por introdusí un sistema di alarma nashonal aki na Kòrsou. E tèstnan a kana satisfaktoriamente. Digicel ta e promé provedor den Caribe pa plania, tèst i demostrá e teknologia aki pa sistemanan di atvertensia nashonal. Sr. Julius Girigori, CEO di Digicel ABC ta suprayá e kompromiso ku Digicel tin ku komunidat di Kòrsou, “Nos ta masha orguyoso di por forma parti di e proseso aki komo partner stratégiko di RAC i Tim di Maneho di Krísis pa desaroyá e ‘cell broadcasting system’ ku ta di vital importansia pa nos komunidat. Ta realmente un orguyo pa Digicel sirbi komunidat di Kòrsou di manera ku ora kualke situashon di krísis òf kalamidat presentá nos ta bon prepará.”
