Toastmasters Club Pabou a instalá su direktiva nobo 2024-2025, bou dje tema un horizonte nobo. Toastmasters Club Pabou (TCP) a lanta pa e area di Bandabou i besindario tambe tin un kaminda mas serka di kas kaminda nan por mehorá nan abilidatnan di komuniká i liderá.
E direktiva nobo 2024-2025 di TCP formá pa Ludson Valks (Presidente), Fabiola Cleofa DTM (Vise Presidente Edukashon, Edelmaris Boelbaai (Vise Presidente Miembresia), Miloushka Rosario (Vise Presidente Relashonista Públiko), Sharine Minguel DTM (Sekretaria), Miosotis Jamanika (Tesorero) i Beatrix Francisco (Sargento di evento) ta kla pa e horizonte nobo den area di Bandabou.
Bandabou ta un area bastante grandi i p’e motibu aki TCP ta brinda e oportunidat pa kibra e barera di miedu i kuminsá traha riba bo mes pa asina bo ta un miho komunikadó òf un mihó lider na kas, na trabou òf den kualke organisashon ku bo ta aden. Un di e aktividatnan pa e aña a aki ta ‘Arte, Abilidat i siensia di papia’, kaminda pa 6 siman ku un invershon fl 90,- partisipantenan lo siña e abilidatnan básiko di entre otro kon hinka un diskurso den otro, kon usa bo gestonan, kon bo ta presentá dilanti públiko i hopi mas. Nos ta inisiá ku esaki dia 1 ougùstùs di 7-9pm te ku 5 di sèptèmber 2024 na Tera Kòrá Plaza. Tur persona ku ta interesá pa traha riba nan abilidatnan di komunikashon por partisipá, nos a sobra 5 lugá mas.
Si bo ta sinti ku awor a yega e ora pa bo sigui desaroyá i bira mas konfidente den bo mes tuma konta ku sra. Edelmaris Boelbaai na nr. 5132305 pa mas informashon òf partisipá na e kurso. Tambe bo por bishitá nos FB Toastmasters Club Pabou.
