Resientemente e famia di Don Andres N.V. a realisá un biahe komersial pa Port of Spain, Trinidad & Tobago na unda a hasi otro paso signifikante pa realisá nan vishon di sigui konektá nos islanan ABC ku region. Entrante Sèptèmber 2024 ta inisiá konekshon marítimo direkto entre Kòrsou i Trinidad & Tobago ku 2 dia di tránsito. Kompania Don Andres N.V i Gulf Shipping Limited a partner pa ofresé un servisio bi-semanal direkto for di Trinidad pa Kòrsou, Boneiru i Aruba.
Durante di e último dianan un komitiva di e kompania Don Andres N.V. i nan partner stratégiko Gulf Shipping a partisipá na diferente reunion ku e.o haf di Port of Spain. Tambe, ámbos kompania a keda risibí na ofisina di Ministerio di Komersio i Industria dor di sr. Minister Paula Gopee-Scoon. Durante di un enkuentro ku Embahador di Reino Hulandes, su Ekselensia Cornelis Hersbach i Sra. Shantal Richardson, Senior Policy Officer a kombersá tokante di e impakto positivo di e konekshon marítimo entre Kòrsou i Port of Spain. Direktor di Don Andres N.V. sr. Eugenio de Jongh a enfatisá ku Don Andres N.V. ta sigui kere den ekonomia di Kòrsou, Boneiru i Aruba. E konekshon direkto aki ta nifiká un gran oportunidat pa komersiantenan di islanan ABC. Pa mas informashon www.donandresnv.com Don Andres N.V. ta gradisí sra. Vanessa Toré di Ministerio di MEO pa su sosten un bes mas, meskos ku tabata e kaso na 2019 na inisio di e ruta pa Rio Haina. E promé barku for di Trinidad lo yega Kòrsou dia 22 di sèptèmber próksimo.
Riba foto: Don Andres N.V. i Gulf Shipping Limited firmando e aliansa stratégiko pa ofresé un servisio direkto di 2 dia for di Trinidad pa Kòrsou, Boneiru i Aruba. Fila dilanti d.r.p.d. Sonja Voisin, Managing Director Gerente di Gulf Shipping Limited, i sr. Eugenio de Jongh Direktor di Don Andres N.V. Mas patras riba e foto Emma Tom i Tessa de Souza di Gulf Shipping, Maurits de Jongh di Don Andres Kòrsou, Maria Winkel di Global Marine i Stefan Mohammed di Gulf Shipping.
