Tabata djárason 14 di Mei 2025 ku un kandela grandi a tuma lugá den e institushon di detenshon Point Blanche na St. Maarten. E kandela a kousa daño signifikante na e edifisio i e fasilidatnan operashonal di e prisòn, ku a lanta preokupashon tokante seguridat di e detenidonan i tambe personal ku ta traha den e instituto.
Den kuadro di esaki, Minister di Hustisia di Sint Maarten, Ms. Nathalie M. Tackling a manda un petishon di sosten na e otro institutonan di detenshon den Reino Hulandes, inkluso Kòrsou, pa yudansa humano i logístiko den maneho di e situashon di emergensia. Mesora tantu Ministerio di Hustisia di Kòrsou, i tambe Minister Shalten Hato mes, a responde positivamente na e petishon. Den espíritu di solidaridat i kolaborashon entre e isla nan den Reino, Kòrsou awe a mandá dos miembro di personal di Sentro di Detenshon i Korekshon Kòrsou (SDKK) pa bai duna asistensia i sosten direkto na e institushon na St. Maarten. Esaki despues ku a evaluá nos propio limitashonnan tambe den SDKK relashoná ku falta di personal.
E dos wardadónan di presu a sali awe djárason atardi pa Sint Maarten, ku e mishon pa yudá garantisá kontinuïdat di operashon básiko i mantené seguridat den Point Blanche. Nan ta bai traha den estrecho kooperashon ku e koleganan di prisòn Point Blanche pa asina stabilisá e situashon den prisòn. Minister di Hustisia Shalten Hato lo siguí monitòr e situashon ku su kolega Minister di Sint Maarten pa asina duna posibel asistensia èkstra si esaki ta nesesario.
