Resientemente Dr. Natasha Rog, a uni su mes i lo fortifiká e tim di Laboratorio de Medicos (LABdeMED) den su esfuerso pa duna un sosten mas fuerte na e laboratorio su pashèntnan i kuido primario en general. Dr. Rog, ku su amplio konosementu i añanan di ehersé no únikamente su profeshon, pero tambe añanan enkargá ku maneho, ta kontribuí na LabdeMed su esfuerso pa kada dia di nobo trese servisionan ku ta kontribuí na alsa salú di nos komunidat. LABdeMED e aña aki ta selebrá 45 aña di eksistensia i tin ambishon pa sigui ta e instansia ku ta inová ku bista riba e nesesidat di nos pueblo.
Dr. Natasha Rog ta un profeshonal médiko pero tambe tin konosementu i eksperensha amplio di maneho. E tin mas di 20 aña komo médiko. Dr. Rog a okupá varios funshon na nivel di gerensha den kuido. Último aki e tabata na kabes di e Raad van Bestuur di Stichting Verpleeghuizen Curaçao. Aki el a perkurá pa konforme su enkargo pa elevá e kuido den kas di kuido (verpleegtehuizen) na un nivel ku ta kumpli ku e demanda al dia. Parti di esaki tabata introdukshon ku éksito di kuido di korto durashon, bou di kua ta kai e proseso di reaktivá e pashènt i kuido hospitalario na un sitio pafó di hospital. Sra. Rog su konosementu, eksperensha lo ta sigur un atkisishon balioso pa e ambishon pa elevá kuido, pero mas importante ainda prevenshon, riba nos isla. Bal enfatisá ku Dr. Rog lo sigui atendé su pashèntnan manera semper ela hasi na su konsultorio.
Kada dia di nobo ta keda probá ku prevenshon ta importante pa garantisá hendenan salú den un komunidat ku ta prosperá. P’esei ta importante pa na Kòrsou nos fortifiká kuido primario pa asina prevení ku hende inesesariamente tin di keda atendé ku kuido spesialisá. Kuido spesialisá mester keda reserva pa hendenan ku realmente mester di esaki. Fortifikando kuido primário ta stimula prevenshon, halsa kalidat di bida i evita komplikashon ku ta pone ku hende mester haña kuido speshalisa. LABdeMED komo un instansia ku semper a biba serka di su komunidat konstantemente ta desaroyá pa por sirbi i kontribuí na mas i mihó salú di nos komunidat.
