E organisashon di Curaçao International Film Festival (CIFF), ku a tuma lugá djarason pa djadumingu último na The Movies Otrobanda, ta wak bèk riba un di diesun edishon sumamente éksitoso. I vários proyekshon tabata kompletamente bendí i un kantidat rèkòrt di bishitante.
E públiko, inkluyendo hopi hóben, a reakshoná ku entusiasmo na e programa, ku hopi apresio pa, entre otro, e Selekshon di Enfoke Karibense ekstenso i e segmento nobo ‘Lost & Found’. Den e sekshon aki, entre otro, a redeskubrí i mustra varios biaha e pelíkula lokal Lanta Para Watapana di Wilbert Tecla di aña 1974.
E di diesun edishon a ofresé un selekshon variá di kasi 70 pelíkula, ku a keda pasa sinku dia den The Movies Otrobanda. Debí na e éksito, e organisashon ya ta anunsiá algun desaroyo bunita pa e di diesdos edishon na 2026. Por ehèmpel, un dia èkstra lo wòrdu agregá na e programashon, ku lo pèrmití mas proyekshon i lo pèrmití pelíkulanan kuminsá mas trempan den oranan di anochi.
Banda di esaki lo lansa un kompetensia nobo pa kreadónan di pelíluka di e parti Karibe i Surinam, pa apoya e komunidatnan sinematográfiko kresiente den e region. E premio aki, e Premio Watapana, ta un homenahe na sineasta Wilbert Tecla, kende den añanan 1970 a hala atenshon riba temanan importante manera deforestashon i eroshon di tera ku Lanta Para Watapana. Segun CIFF, e tabata e promé sineasta di Kòrsou ku a kapturá e tema aki riba pelíkula, i e tema ta relevante te awe.
E nòmber di e premio ta referí na e palu karakterístiko di watapana, ku ta simbolisá forsa i resiliensia. Ku su raisnan hundu e ta logra haña awa apesar di tur sirkunstansia, i e palu ta keda alimentá i ta sigui desaroyá.
E reglamentunan pa partisipashon na e kompetensia lo wòrdu públiká den fin di ougùstùs, kuminsamentu di sèptèmber. E premio, meskos ku e Yellow Robin Award eksistente, ta konsistí di, entre otro, un suma di plaka i partisipashon na e Festival di Pelíkula Morelia na Mexico i Film by the Sea na Hulanda – dos festival lider ku ta forma un trampolin importante pa un públiko mas amplio. E Yellow Robin Award eksistente tambe lo wòrdu ampliá di 5 pa 7 nominado di Karibe, Sentro i Sur Amerika otro aña.
Finalmente, e segmento eksitoso di ‘Lost & Found’ tambe lo regresá otro aña. Pa e edishon di 2026, e organisashon ta buskando un biaha mas pelíkula ‘perdí’ òf otro obranan artístiko ku meresé un esenario. E públiko ta wòrdu invitá pa hasi sugerensia òf profundisá den nan propio archivonan pa haña joyanan skondí ku ta pas den e parti aki di e festival.
E fechanan di e edishon di 2026 lo wòrdu anunsiá pronto. Mas informashon i aktualisashon por wòrdu hañá na curacaoiff.com.
