E Konferensia Karibense di Klima i Energia (CCEC) a konkluí ofisialmente riba djárason, despues di tres dia di diálogo transformativo i palabrashonnan importante pa futuro. E konferensia a konta ku partisipashon di 84 partisipante, inkluso 12 minister i promé ministernan i 47 bishitante internashonal for di 20 pais i teritorionan.
E siman a kuminsá ku inougurashon di Koraal Tabak Wind Farm i lansamentu di e Plataforma regional inovativo “Feeling Hot”: www.feelinghot.org/data.
Un momento importante durante e konferensia tabata anunsio di Minister Sophie Hermans, di un sosten di 150 mion EURO pa Aruba, Kòrsou i Sint Maarten pa stimulá e transishon energétiko.
Durante e apertura, Promé Minister Gilmar “Pik” Pisas a bisa:
“Nos nashonnan por ta chikí na populashon, pero nan ta inmenso den vishon. E kos ku ta konta no ta nos tamaño, sino e tamaño di nos soñonan i nos determinashon pa realisá nan.”
E konferensia a marka tambe un enkuentro históriko entre e premiernan di e tres paisnan di Karibe Hulandes, ku konhuntamente a lansa un yamada fuerte pa kolaborashon i kompartishon di konosementu den Reino.
Albert Martis, presidente di e Plataforma pa Kambio Klimátiko (CCCP), a añadí:
“No tin tempu di pèrdè. E urgensia ta real. E trabou real ta kuminsá awor: implementá, monitoriá i espandé ku konfiansa i responsabilidat.”
Siguiente pasonan:
– Lo kompartí un rapòrt ku akshonnan konkreto ku lo sirbi komo kontribushon pa prepará pa COP30 na Belém, Brasil.
– E website www.ccec.global lo keda aktivo komo un archivo digital.
– E trayekto pa inkorporá Kòrsou den UNFCCC lo kuminsá formalmente.
– E diálogo riba e status di hurisdikshonnan di islanan subnashonal (Subnational Island Jurisdictions – SNIJs) lo kontinuá ku e otro paisnan den Reino.
– UN Global Compact a konfirmá su intenshon pa otorgá akseso na Aruba, Sint Maarten i Kòrsou na su plataforma pa 2026.
