Resientemente a lansa ofisialmente e Trayekto di Entrenamentu Profeshonal (Leertrjaect Professioneel Trainen) pa un grupo di ámtenar selektá den Gobièrnu di Kòrsou. Dia 17 di aprel, un enkuentro inspirativo (kick-off) a tuma lugá na Amazia, markando e komienso di e trayektoria di siñamentu. Durante e enkuentro akí, e partisipantenan a sera konosí ku otro, e programa i tambe e treinernan ku ta bai guia e proseso. E programa di entrenamento mes lo kuminsá ofisialmente dia 15 di mei próksimo i tin komo meta pa forma e grupo di ámtenar akí komo treiner interno sertifiká, ku por yuda nan koleganan ku nan desaroyo profeshonal.
Despues di un proseso di selekshon kuidadoso, inkluso ‘assessment’ i entrevistanan, 25 empleado públiko a wòrdu selektá pa partisipá den e programa intensivo akí. Den e lunanan benidero lo prepará e ámtenarnan akí pa kontribuí komo treiner interno na kresementu i fortifikashon di e aparato gubernamental.
E programa ta enfoká riba desaroyo di kapasidat didáktiko, komunikashon efektivo i abilidatnan di entrenamentu práktiko. E partisipantenan ta wòrdu guiá pa entrenadornan eksperensiá i spesialistanan den formashon, i lo traha riba dunamentu di fitbèk, usando métodonan interaktivo ku yudansa di aktornan di entrenamentu.
Ku e trayekto akí, gobièrnu ta enfatisá su kompromiso pa desaroyo sostenibel di konosementu i kapasidat den e aparato públiko. Dor di entrená su propio empleadonan pa bira treiner profeshonal, ta invertí no solamente den kresementu personal, pero tambe den kalidat di e servisio públiko na komunidat.
E trayekto lo ser finalisá den desèmber ku un tarea práktiko i evaluashon final.
