Kriadó di galiña Xavier Janga (1995) tin un par di amigu so, i esei ta sufisiente p’e. Xavier ta preferá di ta ku su galiñanan. E dos lunanan ku nan ta serka dje nan ta haña tur su atenshon. E galiñanan ku ta wòrdu kriá pa nan karni, tin un bida sin strès.
Un bientu fresku ta supla dor di e kouch’i galiña di su kunuku ‘Nos Mes Por’. Mas o ménos 500 galiña ta wul e tera den tur libertat. Un ta piki un insekto òf larva for di e tera òf ta bebe di e baki di awa, e siguiente ta koba un buraku den tera p’e drumi aden. Ratu ratu Xavier ta kue brasa un di nan.
“Traha ku bestia ta relahá mi. Mi ta hasié ku hopi pashon i amor. En realidat mi no tin bida sosial. Mi no tin problema ku esei. Pa ta honesto mi ta preferá di anda ku bestia na lugá di hende.”
Hopi hende konosé Xavier di deporte di kabai. Komo hóben ya e ta kore na Kampeonato Mundial na Puerto Rico. Banda di esei pa añanan largu e tabata entrenadó di kabai paso fino ku hopi éksito. Te ora el a bende su kuater kabainan un par di aña pasá. E ta mira mas oportunidat den krio di galiña.
Lès 1: Sero strès
Ora na 2021 Xavier disidí pa kria galiña na gran eskala, en realidat e no sa ta kiko e ta hasiendo. Pronto e ta realisá ku esaki ta algu kompletamente otro ku tene algun galiña den kurá komo pasatempu.
Di e promé 400 puitunan, ya 50 a muri su siguiente dia. E kònteiner remodelá no tabatin sufisiente ventilashon. E puitunan ku supuestamente el a pensa di alohá aki na un manera sigur, ta sufri di muchu kalor. Esei ta kousa strès i ta pone ku e puitunan ta kuminsá ataká otro resultando den bludumentu.
“Nos a kumpra un mashin pa kima e punta dje pik. Pero naturalmente kos no mester yega asina leu. Nos no ta hasi esei mas. Awor e puitunan ta kana rònt den kunuku anto esei ta bai mashá bon mes.”
E promé siman ta krusial. Despues di un buelo pisá for di Bélgika, e puitunan ta yega kunuku kompletamente bakuná kontra di malesanan kontagioso di bestia di pluma. Xavier ta agregá eléktrolito i vitamina na e awa di bebe. Nan tin mester di e impulso èkstra ei pa rekobrá forsa lihé.
E galiñanan lokal akí tin un bida agradabel i saludabel i di ningun manera no konosé strès. Bo ta mira i purba esei. Pa medio di medionan sosial Xavier ke transmití e mensahe ei. E ke mustra henter e proseso, di puitu pa produkto final, bou di e lema ‘sa ta kiko bo ta kome’.
Terapia okupashonal pa e galiñanan
E promé dos simannan e puitunan ta keda den e kouchi ku dak, será ku waya pa seguridat. Despues nan ta sufisientemente fuerte pa kana sali via un porta bai e kurá di galiña. Ya e sistema imunológiko ta kapas pa soportá esei. Esta un aventura!
Banda di esei e galiñanan mas grandi di un generashon anterior, ta wul tera den un otro kurá di galiña. Esaki ta terapia okupashonal p’e galiña. Kana, piki den tera, koba. Nan gusta. E ta tene nan okupá i relahá.
E sas riba suela ta bin di e karpinterianan na Kòrsou mes. Esaki ta un manera ideal pa kurbi tera. Mèst di galiña ta konsistí pa 85 porshento di awa. E pidanan di palu kòrtá chikí chikí ta apsorbé e líkido ei.
“Galiña stima wul den sas”, Xavier ta bisa. Esei ta bon kontra parásito, manera árako i pieu.” E ta tene nan limpi i dushi fresku i ta manera nan fitness. Asina nan plumanan i kueru ta keda den bon kondishon.
Xavier ta meskla e sas ku un produkto basá riba ‘organismo mikro efektivo’ (EM). Bakteria, beskein, i otro mikroorganismo aktivo ta tene e medioambiente balansá. Esei ta importante pa evitá un brote di malesa. Brua e meskla un pa dos be pa siman bon den otro, i ayó holó stèrki di mèst di galiña.
Siklo di bida
Esaki ta e base: un área seku, sufisiente espasio, bon kuminda i awa fresku. E bakinan di bebe ta kologá riba suela. E ora ei e awa ta keda mas limpi. Tur dia ta limpia e bakinan di kuminda i awa i yena nan di nobo. Riba dia ku ta hasi demasiado kalor, e puitu- i galiñanan ta haña mas awa fresku ku normal.
Tiki tiki ‘Nos Mes Por’ ta desaroyá su mes den un empresa sirkular. E kouchi ku ta bini liber despues di e benta di un lote di galiña, ta haña sas fresku. Ta usa e mèst den e kunuku mes òf ta bend’é. Aki poko tempu lo tin diferente kos ta krese na e plantashi. E kosecha ku sobra lo bolbe p’e galiñanan. Dje maishi Xavier mes ta traha kuminda p’e galiñanan.
“Semper nos lo keda dependé di importashon, aunke mi mes traha e kuminda p’e galiñanan. Ya komo bo mester agregá ingrediente adishonal n’e maishi mulá. Esei ta bini for di eksterior.”
Kuminda di galiña i puitu ta forma e kategoria di kosto di mas grandi. Xavier ta miembro di AKV (Agrarische Coöperatieve Vereniging) i ta haña un deskuento di 10% riba su kompranan. Kada dos luna ta trara di 350 pa 400 kilo di kuminda pa 500 galiña. Despues di dos luna un galiña ta pisa dos kilo i mei, anto e ta kla pa slaktu.
“Esei mi ta mira komo ‘e sírkulo di bida’. Mi ta sòru pa mi galiñanan tin e mihó bida posibel ku mi por duna nan. Ta bestia nan ta, anto mi tin respèt p’esei. Tambe mi ta haña ku bo mester usa mas tantu parti ku ta posibel dje galiña. Manera igra, kurason i pia.”
E meta: 10.000 galiña
E kouchi ta partí den tres parti. Un nèshi di puitu nobo ta keda dos luna den e mésun espasio te dia di benta. Tur luna Xavier ta pidi 500 puitu. Abase di e pèrmit kontra molèster e por tene un máksimo di 10.000 galiña.
“Si tur kos bai bon, aki sinku aña lo tin 10.000 galiña ta wul den tera. Esei ta mi meta. Awor nos tin kapasidat pa 1.500 galiña.”
Ta parse ku tur kos ta bayendo bon. Xavier tin e tereno, e konosementu i un vishon kla. Pero algu ta bruando tera pa su empresa sí. Enberdat e tin un pèrmit pa tene 10.000 galiña, pero no tin un lugá supervisá kaminda e por slaktu galiña. Esei ta pèrmití pa konsumo propio so.
Tur tenedó di bestia di pluma na Kòrsou tin e problema akí. Tin un abatuar na e isla, pero ei no ta slaktu bestia di pluma. Xavier a haña un pèrmit pa motibu ku gobièrnu no ta distinguí entre galiña ku ta kria pa su karni i galiña ku ta pone webu. Lus bèrdè! Pero pronto esei ta kambia bira kòrá! Slaktumentu na eskala grandi ta prohibí na Kòrsou.
Mayoria kriadó di galiña ta tene galiña ku ta pone webu. Pa e motibu ei mi a skohe pa galiña pa su karni. Mi ta spera ku situation lo kambia i ku mi por slaktu mi galiñanan na abatuar. E ora ei e karni lo risibí un seyo di kùrmester. Ku e aprobashon ei mi por ofres’é na por ehèmpel supermerkado. Awor mi ta haña mi obligá ta bende galiña bibu.
