Minister Presidènt, sr. Gilmar Pisas i Minister di Enseñansa, Siensia, Kultura i Deporte, sr. Sithree van Heydoorn, djaweps 22 di mei 2025 a hasi entrega di sertifikado pa e programa di Biba Amistat na e promé kursistanan di e trayekto #1.
Biba Amistat ta un método di lès ku ta desaroyá pa e segundo siklo di Enseñansa di Fundeshi. E ta pa muchanan di grupo 6, 7 i 8 ku ta enfoká riba nan desaroyo personal i resistensia. Ta un método interaktivo kaminda temanan manera e.o. pubertat, emoshon, konfiansa, amistat, famia, auto-estima, relashon, influensha di medionan sosial, siña konosé e kurpa i seksualidat ta keda tratá. Banda di esaki e ta stimulá tambe diálogo entre e alumnonan mes, ku nan dosente i ku nan mayornan, ku speransa ku tur grandi i chikí por komprondé otro mihó i asina por aktua di manera mas konsiente i responsabel.
Biba Amistat huntu ku Biba Amor ta programanan ku ta diseñá pa fortalesé desaroyo di nos mucha- i nos hóbennan. Biba Amor kual ya a kumpli su di tres lustro i awor ta keda duná tambe na Aruba i Boneiru, ta un programa di orientashon pa skol sekundario. Biba Amistat a keda desaroyá despues, pero ta un tipo di ‘preparashon’ di e muchanan pa e programa di Biba Amor na skolnan sekundario.
E programanan aki a keda introdusí komo responsabilidat di gobièrnu pa ku pueblo di Kòrsou den sentido general, pa e demanda pa informashon tokante desaroyo personal di un mucha promé ku nan yega na skol sekundario, pero tambe pa motibu di e nesesidat pa tin maestronan entrená ku por transmití e informashon di forma korekto i responsabel na mucha- i hòbennan. E lèsnan por ser duná di manera independiente komo tema apart, pero nan ta kombiná bon den e kuríkulo di Enseñansa di Fundeshi i esun di skol sekundario.
E programa tin dos obhetivo prinsipal. Primeramente pa prepará maestronan di grupo 6, 7 i 8 ku ta tuma parti den e trayekto. Asina nan ta haña konosementu, abilidatnan i e kompetensianan nesesario pa nan por duna lès tokante desaroyo personal i resistensia den nan skol. Na di dos lugá, pa duna e alumnonan di grupo 6, 7 i 8 e konosementu i formashon nesesario pa nan por trata ku nan mes, na kas i ku otro hende. E mayornan di e mucha tambe ta haña e informashon nesesario pa nan por guia i apoyá e muchanan. Den e promé trayekto a partisipá kursistanan di A.E. Goilo School, Skol Toirso Martha, Römer School i repesentantenan di trahadónan sosial di DOS, RK-Schoolbestuur i VPCO.
