UNESCO Kòrsou ku ta forma parti integral di Ministerio di Enseñansa, Siensia, Kultura i Deporte (ESKD) a organisá un festival literario riba dia mundial di buki i derechi di outor. Den estrecho koperashon ku Biblioteka Nashonal Kòrsou (BNK), Instituto Nashonal di Idioma, Kressé & Giftstore, Bruna Bookstore, Vida Nova Bank, Curaçao Beverage Bottling Company, Pan-American Life Insurance i Bureau for Intelectual Property (BIP) a tene e festival literario den e área spesial pa eksposishon den sentro komersial SAMBIL.
E festival literario a konta ku presensia di Minister enkargá ku enseñansa sr. Sithree van Heydoorn i a la bes Presidente di e Komishon Nashonal pa UNESCO Kòrsou, Sekretario-General di UNESCO Kòrsou sra. Marva Browne, Direktor di BNK sr. Lysandro Inacio i mas dignatario ku a bishitá e festival . Durante di e dia di 14:00 te 20:00 bishitantenan por a pasa na diferente mesa di organisashonnan ariba menshoná kaminda a duna informashon i bende artíkulo ku tin relashon estrecho ku buki i derechi di outor.
E programa a konta ku vários presentashon manera: kontamentu di kuenta interesante duná pa sr. Tito Ansano, hóbennan di Arte di Palabra a tene diferente presentashon, alumnonan di skolnan di fundeshi Kolegio Fátima, e UNESCO-Scholen Kolegio Don Sarto i Emmy Berthold a presentá poesianan skirbí pa nan mes i tambe alumno nan di SKAIH VSBO-AGO a konta kuenta. E organisashon BIP a tene un presentashon spesial pa tur presente kaminda a para ketu riba e derechi ku e outor tin na momento ku bo krea un produkto ku por ta un kuenta, buki, poesia i /ò pintura.
Na final di e programa a tene un tayer di skirbimentu di forma kreativo (Creative Writing) duná pa sra. Rutsella Palm di “Express Yourself Experience”. Durante di e tayer tur presente di forma gratuito a haña elementonan básiko di skirbimentu kreativo, kon pa diskubrí bo propio estilo i kon pa haña mas konfiansa den bo talento. A la bes a splika ku den e arte di skirbi kreativo ta mas fasil pa desaroyá komo ku bo por ekspresá bo mes mas mihó paso bo ta mas liber.
Komishon Nashonal di UNESCO Curaçao i Ministerio di ESKD por mira bèk riba un aktividat eksitoso i ta yama tur e partisipantenan danki pa nan aporte balioso riba e dia.
