E promé fase di e kampaña di konsientisashon ‘Arma ta Karma’ a keda kompletá ku éksito. Durante e fase akí, e tim a bishitá nuebe skol sekundario komo tambe Justitiële Jeugdzorg Curaçao (antes: GOG), yegando na mas di 1.100 hóben. E tim tabata konsistí di vários influencer den e komunidat di Kòrsou ku por a transmití e mensahe na un manera ku e hóben ta komprondé. Empleadonan di Kuerpo Polisial Kòrsou (KPC), Ministerio Públiko (OM) i Justitiële Zorg (JZ) tambe a forma parti di e tim ku a bishitá e diferente skolnan.
E mensahe sentral di ‘Arma ta Karma’ ta pa hasi hóbennan konsiente di e riesgonan i konsekuensianan di poseshon i uso ilegal di arma di kandela. E kontesta di hóbennan riba e kampaña ta positivo; nan a duna e kampaña i e mensahe un puntuashon entre shete i dies.
Un momento importante den e fase aki tabata e lansamento di un video musikal di e artista di rap Dongo, ku a lansa komo parti di e kampaña. E klip di video awor a risibí mas ku 100.000 views.
Además, den kolaborashon ku Extra Digital i vários plataforma popular manera e podcast di Ministerio di Hustisia ‘Hustisia Seguridat i Abo’, Mòru Bondia, e podcast MissJD i Zaidi, i TV Direct, a sa di alkansá un públiko mas amplio.
E kampaña aki ta inisiativa di Actiecentrum Ondermijning Curacao (ACOC), ku ta kai bou di Ministerio di Hustisia. ACOC ta enfoká riba un aserkamentu integral i atministrativo pa kombatí krimen ku ta debilitá nos komunidat. E kampaña ‘Arma ta Karma’ ta un parti importante di e aserkamentu aki.
