Minister Charles Cooper di Ministerio di Tráfiko, Transporte i Planifikashon di Urbano (VVRP) di Kòrsou ta anunsiá ku plaser ku riba djaluna, 5 di ougùstùs 2024 a tuma lugá un momentu pa firma un kontrato di hür renová pa ‘schietbaan’ Daou.
E firmamentu a tuma lugá na ofisina prinsipal di VVRP riba seru di Arrarat Arrarat i ta relashoná ku e siguiente partinan:
E kontrato ta entre Fundashon Administrashon i Maneho di Terenan di Tiramentu Kòrsou (SABSC) i Pais Kòrsou, i ta relashoná ku e hür di ‘schietbaan’ Daou, situá na Sabana Hundu, pa un periodo di sinku aña.
Presente durante e firmamentu tabata ta:
– Biuda di Michel Daou, Sra. Sonali Daou-Felida
– Yu di Michel Daou, Sr. Anir Daou, Vise Presidente di SABSC
– Miembro di Bestür, Sr. Clifton ‘Pepi’ Hoyer
– Miembro di Bestür i Sekretario di SABSC, Sr. Curd Everts
Minister Cooper a hiba e siguiente palabranan di apresio pa Michel Daou.
Pa ministerio e kontrato aki ta un aktividad normal di tur dia, pero pa e fundashon, esaki ta un momentu grandi i di gran balor. Esaki ta ku sentido miksto mirando ku Sr. Michel Daou mes no por ta presente, despues di lucha kasi trinta aña pa yega na e momentu aki. Sr. Michel Daou tabata un gran deportista ku a destaká den beisbòl, sòftbòl, i tiru, i a partisipá na tres Olimpiada: 1992 na Barcelona, 1996 na Atlanta, i 2000 na Sydney. El a wòrdú honrá ku un Kondekorashon Real na 2022-2023 pa tur su logronan i kontribushon na deporte di tiru.
E akto di firmamentu a tuma lugá nèt tres luna despues ku Michel Daou a fayesá (5 di mei 2024), i e fecha aki ta kai den temporada di Olimpiada. Na akto aki, Minister Cooper a duna espasio pa Sra. Sonali Daou-Felida i Sr. Anir Daou pa duna nan palabra.
E promé kontrato renová i su importansia:
Ku e firmamentu di e kontrato renoná, Ministerio VVRP huntu ku SABSC ta sigurá i konsolidá e fasilidat ‘Daou Shooting Range’ pa e deporte di tiru i desaroyo di esnan ku ta train ku arma pa motibu di nan trabou. Na bida, SABSC huntu ku Ministerio VVRP a logra pa aloká i konstruí e fasilidat di Defensie, ku tambe lo karga nòmber di Michel: ‘Defensie Schietinrichting Daou’, un gran honor pa su memoria.
