Resientemente, Ministerio di Desaroyo Ekonómiko a organisá un seri di training ku enfoke riba fortifikashon di abilidatnan di coachnan lokal. E inisiativa aki ta parti di e programa Biz2Biz, ku tin komo meta redusí burokrasia (red tape) i gastunan empresarial (cost of doing business).
E trainingnan a wòrdu fasilitá pa Nelida Catalina, un coach ku eksperensia internashonal, i Tsnatee Elisa, un hóben profeshonal eksperto di Kòrsou. Nan a enfoká riba mehorashon di téknikanan di coaching di negoshi i uso efektivo di LinkedIn, ku e propósito pa kapasitá partisipantenan pa nan por eksportá nan servisionan internashonalmente. Meta di e seshonnan tabata pa desaroyá kapasidat lokal i promové ‘brain circulation’, kaminda konosementu i abilidatnan ta keda kompartí i fortifiká den komunidat.
Coaching pa prestashon superior di negoshi
Nelida Catalina a proveé partisipantenan téknikanan avansá di coaching dirigí riba mehorashon di prestashonnan di negoshi na nan klientenan. E enfoke tabata riba desaroyo di informashon stratégiko, ofresiendo hèrmèntnan práktiko ku coachnan por usa pa asistí empresarionan chikí i mediano (MKB) di un manera mas efektivo.
LinkedIn un hèrmènt pa ekspanshon internashonal
Paralèl na e seshonnan di coaching, Tsnatee Elisa a dirigí un workshop di LinkedIn, kaminda partisipantenan a siña kon pa optimisá nan profil pa amplia nan ret di kontakto profeshonal i promové nan servisionan internashonalmente. E seshon práktiko aki a ofresé partisipantenan e oportunidat pa hasi mehorashonnan inmediato na nan propio profil di LinkedIn, ku e ophetivo di oumentá nan visibilidat riba e plataforma global.
E trainingnan aki a ser risibí ku entusiasmo i a demostrá di ta un medio efektivo pa fortifiká signifikativamente e kapasidatnan di coachnan lokal. Ofresiendo e trainingnan aki, Ministerio di Desaroyo Ekonómiko no solamente ta apoyá kresementu profeshonal di individuonan, pero tambe ta stimulá resiliensia ekonómiko i inovashon den henter komunidat di Kòrsou.
E inisiativanan aki ta posibel danki na e apoyo di Tijdelijke Werkorganisatie (TWO), i ta reflehá e kompromiso di MEO pa invertí den desaroyo di talentonan lokal i stimulá diversifikashon ekonómiko i komèrsio internashonal.
