Ku mira riba un maneho sostenibel di marshenan den sentro di Willemstad, Fundashon Marshe i Minister di Desaroyo Ekonómiko (MinEO), ing. sr. Charles Cooper, a firma awe ofisialmente un akuerdo di maneho nobo pa e periodo 2025 – 2028. E paso aki ta enfatisá e kompromiso komun di e fundashon i e ministerio pa fortifiká e ròl di e marshenan komo sentro kultural, sosial i ekonómiko den sentro di Willemstad.
Den kuadro di e akuerdo aki, a nombra ing. señor Remy Ricardo komo direktor interino di e fundashon. Durante e fase di transishon, lo e ta enkargá ku e maneho diario. Señor Ricardo lo enfoká riba fortifikashon di e organisashon, mehorashon di e prosesonan operashonal i ehekushon di e vishon pa tur e seis marshenan den nos sentro di siudat.
Fortifikashon di komèrsio i protekshon di patrimonio kultural
Fundashon Marshe tin un ròl esensial den e maneho i desaroyo di marshenan i nan ambiente serkano den sentro di siudat. Den kolaborashon estrecho ku partnernan di sektor públiko i privá, e fundashon ta traha riba krea un espasio sigur, atraktivo i sostenibel pa e marshe. E meta ta pa krea un espasio kaminda empresarionan lokal por krese, bishitantenan ta wòrdu atraé i nos patrimonio kultural por keda protehá i apresiá.
E akuerdo di maneho nobo ku MEO ta ofresé un fundeshi firme pa kolaborashon struktural, transparensia i mas profeshonalismo. Ku esaki, ta traha riba marshenan ku ta kontribuí na un sentro di komèrsio, kultura i komunidat yen di bida na Kòrsou.
