Despues ku aña pasá e organisashonnan Global Entrepreneurship Week Curaçao (GEW Curaçao) i Curaçao Tech MeetUps a firma un akuerdo di kolaborashon pa medio di un MoU, dirigentenan di e organisashonnan menshoná aki riba a bai di akuerdo pa kontinuá e kolaborashon.
E aña aki lo selebrá Global Entrepreneurship Week pa di 10 aña konsekutivo na Kòrsou i miéntras ku Curaçao Tech MeetUps, ku na 2018 a inisiá ku un seri di charla na Universidat di Kòrsou a krese bira un evento ku ta dura hinter un siman durante ku lo elaborá i diskutí riba diferente tema interesante. E aña aki un biaha mas e eventonan di Tech MeetUps ta parti di e asina yamá ‘On the Road to GEW.
Global Entrepreneurship Week ta un inisiativa di e organisashon mama, Global Entrepreneurship Network (gen.org), ku sede na Washington, na kua tin mas ku 200 pais afiliá. E propósito di e ‘siman’ ta pa tira lus riba e emprendedó, ku pa medio di ideanan inovativo di negoshi ta kontribuí na ekonomia di su pais, i tambe ta pèrkurá pa kuponan di trabou. “Durante di e promé añanan di GEW Curaçao por a tene un siman di aktividat. Danki na kolaborashon di desénas di organisashon ku a mustra interes pa organisá nan evento bou di e parasòl mundial GEW, ya no tabata posibel pa nos hinka tur aktividat den un siman” sra. Elgenia Pieternella, presidente di GEW Curaçao a bisa. “Pa e motibu ei nos a krea un sekshon ku nos ta yama ‘On the Road to GEW’, ku ta tuma lugá e lunanan previo na GEW mes, ku e aña aki GEN a stipulá na e siman di 18 pa 24 di Novèmber,”sra. Pieternella a sigui informá. Ku satisfakshon nos ta informá ku Curaçao Tech MeetUps a bai di akuerdo pa ekstendé nos akuerdo di kolaborashon pa tene un ‘full’ siman di aktividat komo parti di On the Road to GEW 2024. E akuerdo ta enserá entre otro ku nos lo kontribuí na promové Curaçao Tech MeetUps, tantu lokal, komo internashonal. ”
“Tur aña na e konferensia mundial ku GEN ta organisá, nos ta tuma nota ku e organisashon mama, i representantenan di paisnan afiliá na GEN ta remarká e kolaborashon di diferente partner bou di e parasòl di GEW Curaçao. Asta t’asina ku un aña nos a risibí un rekonosementu den forma di award di GEN, tirando lus riba e echo ku ‘per capita’ nos a logra di trese mas tantu partner huntu. E desaroyo aki a sigui krese, ku ta algu ku nos ta sumamente kontentu kuné. Nos invitashon ta bai na tur hende pa chèk e programa di Curaçao Tech MeetUps i registrá pa asistí na e eventonan. Di parti di Global Entrepreneurship Week mes nos por informá ku nos ‘board’ ya pa algun luna ta trahando riba un programa ekstenso i diverso ku despues di e siman di Curaçao Tech MeetUps, nos lo anunsiá. Nos lema pa e aña aki ta: Impacting Lives Through Health and Wealth. Nos invitashon ta pa sigui nos kuentanan di Instagram i Facebook i tambe nos website nobo; www.gewcuracao.com.”
Finalmente nos ke hasi un yamada na organisashonnan ku tin un aktividat planiá ku e propósito pa empoderá e empresario i su organisashon(nan) pa tuma kontakto ku nos pa diskutí posibilidatnan di kolaborá pa asina huntu nos traha na sigui elevá nos mundu di emprendedónan.”
