Djadumingu 26 di yanüari 2025, Fundashon Ser’i Otrobanda (FSO) a organisá un evento pa selebrashon di komienso di aña. E evento a tuma lugá na Keizershof Luna Blou di 5’or di atardi pa 8’or di anochi. Ademas di presentashon musikal i baile tabatin oportunidat pa habitante i invitadonan skibi nan deseo pa e bario riba un canva. Di e forma aki ta kontribuí tambe na desaroyo di Ser’i Otrobanda en partikular i Otrobanda en general.
FSO ta eksistí pa mas ku 10 aña i a organisá, inisiá i fasilitá diferente proyekto i ta embolbí habitantenan den nan plan di aña. Ku e meta aki FSO lo evaluá kada deseo ku presentenan a skibi pa determiná kua di nan por forma parti di su plan di aña i kua lo referí na e organisashonnan konserní manera instansianan gubernamental, no gubernamental, sosial i partikular riba nivel di hustisia i órden públiko, infrastruktura, sosial, ekonómiko, salubridat etc. ku enfoke riba habitantenan di tur edat.
Presentenan a disfrutá di un evento masha ameno i agradabel ku presentashon di DJ Gwendy, un hóben di apénas 18 aña ku sa kon entretené ku músika ku ta pas ku e públiko. Un kantidat di mas o ménos 28 bailarina hóben di e grupo di baile D’Art a presentá 4 baile. Pa koroná e anochi Leo Martis a deleitá e públiko riba su kitara ku kansionnan konosí. Tabata un plaser di tende i mira nos hendenan ta kanta sam sam ku Leo.
E anochi tabata posibel ku kontribushon di su partnernan: Keizershof Luna Blou, Kaya Kaya, DWA Tandartsen, HBN Law & Tax, Corendon, Kura Hulanda, The Triangle, Greenhouse, Freedom Hotel, Pshychologen praktijk Gisette Wederfoort, Distribier i Kortijn Ijs.
Direktiva di FSO, presidente Rustanne Stephens-Mercelina, Arto Elstak, Kahrin Durguti i Valeska Boom ta gradisí tur partner, habitante, invitadonan i tur hende ku di un forma òf otro a hasi e anochi unu eksitoso.
