Courtyard by Marriott Curaçao ta anunsiá Ernst van Zutphen komo su GM nobo. Van Zutphen ta trese kuné mas di 20 aña di eksperensia den industria hotelero i un karera ku a demostrá su mes den maneho di hotèl, hospitalidat i ekselensia operashonal.
Su liderazgo stratégiko i abilidat di inspirá i motivá su tim- i empleadonan ta hasié un atkisishon di balor pa Courtyard Curaçao. Van Zutphen a sa di logra éksitonan importante den mundu hotelero, manera kon pa mehorá eksperensia di huéspet serka diferente hotèl internashonal di renombre, oumentá efisiensia operashonal i realisá kresementu den sifranan di okupashon di e hotèlnan ku e’la manehá.
“Ernst van Zutphen ta trese kuné un kombinashon impreshonante di eksperensia i liderazgo ku ta krusial pe desaroyo di nos hotèl den e tempunan benidero,” esaki di akuerdo ku Alberto da Costa Figueira di CMC Operations N.V. i Courtyard Curaçao. “Su vishon i ekspertisio lo yuda nos pa sigui elevá e servisio i kalidat ku nos huéspetnan ta spera di nos.”
Van Zutphen ta determiná pa habri portanan di Courtyard Curaçao ku éksito; durante di e último lunanan a bin ta dal pasonan konkreto pa esaki. E ta ekstremadamente kontentu ku e tim di Courtyard, ku pa 90% a keda reklutá lokalmente. “Mi ta entusiasmá pa tuma mi ròl i ta spera di por kontribuí na éksito di Courtyard Curaçao i n’e kresementu i desaroyo di nos tim i den esaki hasi un impakto positivo den nos komunidat. Mi meta ta pa sigurá ku tur huéspet tin un eksperensia ekselente i ku tur kolega hasi nan trabou ku pashon,” asina Van Zutphen a komentá.
Courtyard Curaçao ta duna Ernst van Zutphen un kaluroso bon bini i ta den espektativa pa mira su impakto riba e hotèl. Apertura di Courtyard by Marriott Curaçao lo tuma lugá e luna aki.
Sigui retnan sosial di Courtyard by Marriott Curacao pa mas informashon riba e fecha eksakto di apertura.
