Djaweps 11 di yüli 2024 a tuma lugá presentashon di “branding” nobo di e programa di radio di Ministerio di Hustisia ‘Hustisia, Seguridat i Abo’. E branding nobo akí ta trese kuné ku awor e informashon ku Ministerio di Hustisia tin pa duna ta mas serka di Abo.
Na yüli 2015 a forma e tim di redakshon di Hustisia Seguridat i Abo (HSA). E presidente di e redakshon tabata qepd sr. Marlon Jamaloodin sigui pa aworaki sra. Jennifer Hypolite. E redakshon di HSA ta konsistí di trahadónan di Ministerio di Hustisia ku banda di nan trabou ta hasi e parti di redakshon i tambe presentashon dje programanan na radio.
E meta di Hustisia Seguridat i Abo ta pa informá nos komunidat mas tantu posibel tokante e temanan ku Ministerio di Hustisia tin di haber kuné komo ku tabatin un tendensia ku manera un persona tende Hustisia ku esaki outomatikamente ta nifiká polis.
Hustisia Seguridat i Abo (HSA) a inisiá 3 di sèptèmber 2015 na radio Direct 107.1FM ku un programa “live” tur siman. Tur siman HSA ta risibí invitadonan riba temanan ku tin di haber ku Hustisia. Hustisia tin temanan ku ta kore den e otro ministerionan òf organisashonnan i asina nos ta invitá esakinan pa tambe tei i konta mas tokante e tema. E oyentenan no tabata keda afo i nan por yama i hasi nan pregunta.
Mirando e modernisashon di nos medionan sosial i e diferente plataformanan ku a bini aserka e tim di redakshon a deliberá hopi riba kon nos por yega mas serka di e pueblo i en partikular nos hubentut. Asina a yega na e “rebranding” di Hustisia Seguridat i Abo kaminda awor a añadí tambe un podcast aserka. Pues esaki lo bai ta un kombinashon di podcast i programa “live” na radio pero tambe di reels, stories, snippets riba nos medionan sosial.
Por skucha i mira e podcastnan for di otro siman riba tur nos plataformanan social manera youtube, facebook i Instragram. Hustisia i Seguridat mas serka di Abo.
