Ministerio di Enseñansa, Siensia, Kultura i Deporte (ESKD) resientemente a tene un seremonia inougural pa e Instituto Nashonal di Kultura (INdiKU). E instituto, ubika den sentro di siudat riba Gomezplein, tin komo meta protehá, reforsá i stimulá aktivamente e herensia kultural di Kòrsou.
Pa yuda garantisá, promové i sostené “maneho responsabel” den e komunidat kultural na Kòrsou, ESKD mediante INdiKU ta kuminsá un trayekto intensivo pa reforsá kapasidat den organisashonnan ku diariamente ta dunando un aporte na desaroyo kultural den nos pais. INdiKU su vishon ta pa duna sosten na tur sosio (partnernan) den sektor kultural. Pa logra ehekutá su vishon, INdiKU ta konsiente ku algun di su sosionan kultural, tin nesesidat pa reforsá nan kapasidatnan organisatorio atministrativo. Entrante 23 di Aprel próksimo te ku 19 di Yüni 2025
E trayekto di formashon tin komo meta pa krea un base sólido pa e Instituto Nashonal di Kultura por sostené, konektá i representá e sektor kultural di forma efektivo den futuro. Durante di e trayekto di formashon lo trata diferente tema i tópiko. Entre otro:
- Búskeda i sondeo di fondo
- Traha presupuesto di proyekto
- Liderazgo
- Prinsipionan básiko di merkadeo
- Strategianan di media sosial
- Ekonomia kultural
- Komunikashon interkultural
E entrenamentunan i seshonnan interaktivo ta fasilitá i presentá pa eksperto i profeshonalnan den e ramo kultural. Tantu lokal komo internashonal. Ministerio di Enseñansa, Siensia, Kultura i Deporte (ESKD) ta konsiderá e trayekto komo un parti esensial den e meta pa formalisá INdiKU. ESKD ta mira e importansia pa duna refuerso na e infrastruktura kultural di Kòrsou.
Promé kurso 23 di aprel
E promé aktividat den e trayekto ta e presentashon di Cultuurfonds Caribisch Gebied. Melanie Sloot, eksperto lokal riba struktura di fondonanan kultural, ta presentá e diferente alternativanan disponibel pa aplikashon di sosten finansiero. E presentashon ta tuma lugá djamars 23 di aprel pa 18:30 pa 20:00 di atardi na Bon Bini Business Center. Durante di e seshon, partisipantenan ta haña un bista riba e manera di traha, posibilidatnan i kondishonnan di e fondonan i kon por apliká ku éksito pa finansiamentu di proyektonan kultural.
Partisipashon ta grátis. Por inskribí via di e siguiente link: https://forms.office.com/r/pdKg89CaMQ
Despues di inskripshon lo sigui un mail di konfirmashon. E programa kompleto di e trayekto pa reforsá kapasidat lo ser kompartí pronto via di e kanalnan di ESKD i INdiKU. Pa mas informashon por tuma kontakto ku:
Aisha Gijsbertha-Leer via WhatsApp +599 9 516 6973 òf mail [email protected]
