Djaluna, dia 31 di mart 2025, Wind Creek Curaçao Resort a inougurá tres stashon di karga eléktriko. Esaki a bira posibel mediante un partnership stratégiko ku TUI i Dynaf. E kolaborashon aki ta suprayá nan kompromiso ku sostenibilidat i responsabilidat korporativo. Trahando huntu e kompanianan ta kolaborá pa mobilidat mas bèrdè, redusiendo impakto ambiental i reforsando e dedikashon na un futuro mas sostenibel p’e komunidat ku tur tres empresa ta sirbi.
Angelo Martes, Direktor di Rekurso Humano, di Wind Creek Curaçao a komentá ku nan ta komprometé na aportá na e komunidat kual nan ta sirbi dor di krea un kultura di sostenibilidat, práktikanan di negoshi étiko i kompromiso ku pais. “Ku instalashon di tres stashon di karga EV, Wind Creek Curaçao ta mustra su kompromiso ku práktikanan sostenibel den su operashonnan”. Pa akseso fásil pa huéspet i bishitante e stashonnan di karga ta konvinientemente situá riba e di dos piso dje garashi di Renaissance Wind Creek Curaçao Resort. Durante e próksimo tres lunanan e stashonnan di karga lo ta disponibel pa uso komplementario.
Wind Creek Curaçao a implementá diferente inisiativanan di sostenibilidat inkluyendo prinsipalmente uso di iluminashon di energia abou i sensornan di moveshon pa efisiensia di energia, re-uso di awa pa ‘landscaping’ ku propósito di konservashon di awa i bakinan di resiklahe den áreanan públiko. Tambe den kambernan di huéspet a implementá programanan di re-uso di paña i sèrbètè pa minimalisá konsumo di energia i mas, den esaki ta motivá e huéspet pa yuda konservá nos medio ambiente. Ta laga e kliente mes skohe si ta deseá di aportá n’e programa di sostenibilidat. Ku tur e inisiativanan aki i algun mas ku pronto lo keda implementá, Wind Creek Curaçao ta demostrá un kompromiso fuerte ku sostenibilidat ambiental.
