Tur hende ta sinti nan sigur i komodo den e area ku nan ta aden, pero berdadero kresementu ta sosode na momentu ku bo tuma e paso pa sali for e di area di komodidat aki i superá bareranan. Den un esfera ameno, Baden Powell Toastmasters Club a instalá su direktiva nobo pa aña 2024-2025 ku e tema “Desafiá bo limité”.
E direktiva di Baden Powell Toastmasters Club di aña 2024 – 2025 ta konsistí di:
- Presidente – TM Miloushka Rosario
- Vise Presidente Edukashon – TM Francis Angelica
- Vise Presidente Miembresia – TM Sinaï Mathilda
- Vice Presidente Relashonista Públiko – TM Laurella Martis
- Sekretaria – TM Mariëla Troeman
- Tesorero -TM Rudsel Albertoe
- Sargento di Evento – TM Junilda Manuela-Cicilia
- Presidente saliente – TM Regis Mercera
Presidente Sra. Miloushka Rosario a komparti e tema di e aña aki ‘desafia bo limité’ ku enfoké pa e miembro òf prospekto miembro ku ke djòin Baden Powell Toastmasters Club traha pa ta sobresaliente i bira e miho vershon di su mes. E direktiva aki huntu ku miembronan ta bai traha riba identifiká areanan kaminda e miembro ta sinti’e komodo den dje i reta e miembro pa amplianan su horizonte pa asina e por mira kuantu potensial mas e tin. Oradó di òrden pa e anochi aki Sr. Regis Loo a amplia riba kon pa keda motivá i motivá otronan, paso un bela por sende mas bela.
Djasabra último tambe a selebrá diferente miembro ku tabata ekselente den 2023-2024 manera, e mihó “timer” TM Jevaughn Maduro, e mihó “grammarian” TM Clara Un, e mihó “ah counter” TM Rudsel Albertoe, e mihó “table topics master” TM Omara Martina, e mihó “table topics speaker” TM Regis Mercera, e mihó “evaluator” TM Zoraida Adelaida-Pisas, e mihó “Toastmaster of the meeting” TM Miloushka Rosario, e mihó “invocator” TM Junilda Manuela-Cicilia i e mihó “Speaker” TM Regis Mercera. Na final a rekonosé e persona ku a bira “Toastmaster of the Year” kual a resultá di ta TM Miloushka Rosario. Baden Powell Toastmasters Club ta mira bèk riba un 2023-2024 ekselente komo un “President Distinguished Club”, ku ta e distinshon di mas haltu den Toastmasters pa un klup i esaki pa di 5 aña konsekutivo.
Ahinda bo ta dudando kon pa superá bo bareranan i desafia bo limiténan pa papia den públiko òf ta un mihó lider? Tuma kontakto ku nos Vise Presidente Relashonista Públiko Sra. Laurella Martis na telefòn òf whatsapp +5999 513 7250 i nos lo splika bo kon nos por yuda bo sali for di bo zona di komodidat. Baden Powell Toastmasters Club ta kla i hopi entusiasmá pa kuminsá ku su reunionnan edukashonal dia 6 di ougùstùs 2024 na JCC Kwartier di 7pm pa 9pm.
