Dia 19 pa 21 di mei último, un delegashon di United Nations Delevelopment Programme (UNDP), enkabesá pa Sr. Ugo Blanco, e representante di UNDP pa Aruba, Kòrsou, Sint Maarten i Trinidad & Tobago, a bishitá Kòrsou den kuadro di implementashon di e 17 ophetivonan di Nashonnan Uní pa un desaroyo sostenibel (“Sustainable Development Goals”) riba tereno di, entre otro, kombatimentu di pobresa, edukashon, salubridat, energia, labor i ekonomia, igualdat, produkshon i konsumpshon, kambio di klima, i mas.
E intenshon ta pa e metanan aki wòrdu realisá na aña 2030 pa kada pais miembro di Nashonnan Uní. Komo parti di Reino Hulandes, Kòrsou tambe ta mará na implementashon di e proyekto akí, bou di kordinashon di Promé Minister Gilmar Pisas. Den e kuadro akí, riba petishon di Gobièrnu di Kòrsou, UNDP a hasi algun análisis kon leu Kòrsou ta den implementashon di e 17 ophetivonan pa un desaroyo sostenibel i a presentá e resultadonan na e ministerionan di gobièrnu ku ta enbolbí den e trayekto akí.
Na final di e bishita na Kòrsou, dia 21 di mei último e delegashon di UNDP, kual banda di sr. Blanco tambe a konsistí di sra. Isele Robinson-Cooper, Hefe di Inklushon Sosial i Maneho, i sr. Javier Bronfman, konsehero prinsipal pa SDG, a hasi un bishita na Promé Minister Gilmar Pisas i Konseho di Minister, kaminda Sr. Blanco a splika gobièrnu ku a base di e análisisnan hasí, UNDP por konkluí ku Kòrsou ta hasiendo bon progreso den implementashon di e ophetivonan i nan ta asta kere ku Kòrsou por bira un modelo pa otro paisnan den region pa loke ta trata implementashon di e ophetivonan.
Ademas a palabrá ku Kòrsou lo hasi uso di UNDP pa adaptá su Plan di Desaroyo Nashonal, teniendo kuenta ku e ophetivonan pa un desaroyo sostenibel i e programa di gobernashon di Gabinete Pisas III.
