Gobiernu di Kòrsou ta orguyoso pa anunsiá ku e lo ta anfitrion di e Caribbean Climate & Energy Conference (CCEC) ku lo tuma lugá di 26 pa 28 di mei 2025 na Kòrsou. E konferensia na nivel ministerial, lo reuní lidernan di paisnan manera Barbados, Sint Maarten, Aruba, Grenada, Santa Lucia, Maldivas i Bolivia.
CCEC ta organisá konhuntamentu ku Gobièrnu di Hulanda, ku lo ta representá pa minister Sophie Hermans (Maneho di Klima i Kresementu Bèrdè). E konferensia ta enfoká riba fortalesé kolaborashon regional riba e tema di klima i energia, ku énfasis riba solushon práktiko i kompromisonan kompartí.
Bou di e tema “Shaping a Resilient Future: Regional Strategies for Climate Action”, e konferensia lo sirbi komo plataforma pa desaroyá un posishon regional koherente pa COP30, fasilitá interkambio di konosementu tokante desaroyonan i solushonnan klimátiko, i fortalesé kolaborashonnan entre paisnan karibense i partisipantenan internashonal.
Kòrsou, komo un Small Island Developing State (SIDS), ta konsiente di e desaroyo i oportunidatnan ku kambionan klimátiko ta trese. E isla ta sirbi komo un sentro pa inovashon, transishon energétiko i kolaborashon regional.
“Organisá Caribbean Climate & Energy Conference 2025 ta reflehá e kompromiso di Kòrsou pa desaroyo sostenibel i kolaborashon regional”, segun Promé Minister Gilmar Pisas. “Nos isla, konosí pa su kultura vibrante i biodiversidat riku, ta ofresé un ambiente ideal pa lidernan bini huntu i buska solushonnan konhunto pa nos desaroyo klimátiko.”
E konferensia lo trata tópikonan manera integrashon di energia renobabel, resiliensia klimátiko, finansiamentu pa infrastruktura sostenibel i inovashon di maneho. E evento lo finalisá ku firmamentu di un deklarashon konhunto ku ta stipulá metanan i kompromisonan komun.
Pa mas informashon tokante e konferensia, bishitá https://ccec.global.
