Kòrsou pronto lo ta e episentro mundial di komersio i kolaborashon ora e fungi komo anfitrion di e prestigioso ‘XXVII Conferencia de Zonas Francas de Iberoamérica’ (Ibero American Free Trade Zone Conference) for di 13 di novèmber te ku 15 di novèmber 2024. E evento históriko aki lo trese huntu lidernan i visionarionan di e industria di Zona di Komersio Liber (FTZ), organisashonnan di gobièrnu, invershonistanan i proevedónan di servisio prosedente di mas ku 30 pais. Esaki lo marka un logro signifikante den desaroyo ekonómiko regional. Durante un konferensha di prensa, Minister di Desaroyo Ekonómiko, Sr. Ruisandro Cijntje, huntu ku direktor ehekutívo di Zonas Francas de las Américas (AZFA), Sr. Julio Rodriguez a lansa e konferensha.
E konferensia ta keda organisá pa medio di un kolaborashon entre e Asosiashon di Zona Liber di Amérika (AZFA) i Curaçao Industrial and International Trade Development Company (CURINDE). Durante e konferensha lo presentá e último tendensianan i mihó práktikanan den e sektor, e situashon aktual geo-polítiko internashonal, oportunidatnan nobo pa atraé invershon, i e impaktonan di inovashon i teknologia den e sektor.
Momentunan kardinal durante e konferensia
E evento lo tuma lugá na Renaissance Wind Creek Curaçao Resort, i tin un programa amplio kual lo inkluí presentashonnan, diskushonnan den panel, i e Reunion General di AZFA. Lo inisiá e konferensia ku diskursonan di:
• Sr. Mohamed Al Zarooni, Presidente di e Organisashon Mundial di Zona Liber
• Sra. Claudia Pellerano, Presidente di AZFA
• Sr. Gilmar Pisas, Promé Minister di Kòrsou
Minister Cijntje lo liderá e panel ministerial durante e konferensha den kual lo partisipá varios minister prosedente for di region.
Banda di e agènda di konferensia intensivo, partisipantenan tin oportunidatnan amplio pa eksperensiá e kultura vibrante, herensia riku, i hospitalidat kaluroso ku Kòrsou ta ofresé.
Un plataforma úniko pa inovashon i kolaborashon
‘XXVII Conferencia de Zonas Francas di Iberoamérica’ ta ofresé un plataforma úniko kaminda kompanianan por demonstrá nan mes i partisipá den diálogo signifikante ku otronan igual den e industria. E enkuentro no ta solamente un foro pa interkambio di konosementu pero tambe un selebrashon di e esfuersonan kolektivo pa kresementu i desaroyo ekonómiko sostenibel pa e isla i e region.
Tokante AZFA i CURINDE
AZFA ta un organisashon non-profit dediká na promové i defendé legislashon di Zona di Komersio Liber den henter Ibero-Amérika pa medio di integrashon, investigashon i koperashon entre sektor públiko i sektor privá. Representando afiliadonan den 21 pais den dos kontinente, AZFA ta fungi komo e organisashon regional di Zona Liber prinsipal, ku ta akapará mas ku 800 Zona Liber i 11.000 kompania.
Lokalmente, CURINDE ta manehá dos Zona Ekonómiko Liber i tres Parke Industrial i ta hunga un ròl krusial pa loke ta trata e parti ekonómiko di e isla. Curinde ta miembro di AZFA for di 2016.
Pa mas informashon i pa registrá pa partisipá na e konferensia, por bishitá www.azfacuracao2024.com òf tuma kontakto ku nos na [email protected].
