Resientemente, un delegashon di e Sektor di Kolaborashon Ekónomiko Internashonal di Ministerio di Desaroyo Ekonómiko (MEO) a realisá un bishita di trabou na Colombia, spesífikamente na e siudatnan di Bogotá i Riohacha. E bishita aki tabata den kuadro di evaluashon di e Akuerdo di Entendimentu (Memorandum of Understanding – MoU) firmá entre Kòrsou i La Guajira, inkluyendo e siudatnan di Riohacha, Dibulla i Maicao. E bishita a resultá den un eksperensia balioso ku hopi interkambio di informashon i oportunidatnan pa fortifiká e relashon bilateral.
Den kuadro di e mesun kooperashon, Kòrsou ta risibí un delegashon ofisial for di La Guajira e siman aki. E delegashon a yega djárason 14 di mei 2025 i lo keda te djasabra 17 di mei 2025.
E delegashon ta enkabesá pa Sr. Jairo Alfonso Aguilar Deluque, Gobernador di Departamentu di La Guajira, i ta konsistí di 12 miembro, inkluyendo:
- Rafael Zúñiga – Sekretario di Turismo
- Zuelly Manjarrez – Sekretaria di Desaroyo Ekonómiko
- Charles Aguilar – Asesor di e Despacho di e Gobernador
- Yessit Medina – Gerente di Grupo Empresarial Gran Caribe, ku ta traha estrechamente ku Wilbert Geertruida di Agribusiness Curaçao
Huntu ku otro representantenan di sektor públiko i privá, e bishita ta enfoká riba:
- Promové La Guajira komo destinashon turístiko
- Diskutí kooperashon den área di transporte, komèrsio i turismo
- Presentá proyektonan di invershon ku por benefisiá ambos region
- Fortifiká e lasonan institushonal i relashon entre sektor públiko i privá
E bishita ta un paso importante den e desaroyo kontinuo di e relashon Sur-Sur entre Kòrsou i La Guajira, basá riba prinsipionan di solidaridat, hermandat i desaroyo konhunto.
