Asuntunan Públiko (Kranshi) di e ministerio di Maneho di Gobernashon, Planifikashon i Servisio Públiko ta notifiká pueblo en general ku entrante djasabra, 7 di yüni 2025, e ta habri spesial pa inskripshon. Kranshi ta habri pa 4 djasabra konsekutivo den luna di yüni aki di 8 or pa 2:30 di atardi.
Konforme di lei tur habitante ku ta biba na Kòrsou mester inskribí na Kranshi. Pa por garantisá un servisio optimal Kranshi ta tene na kuenta ku próksimente e kantidat di personanan ku ta risibí nan pèrmit di estadia ta bai subi. Esaki ta trese kuné ku durante siman e bishitantenan na Kranshi ta bira basta mas tantu. Relashoná ku esaki mester krea forma pa atendé tur kliente ku e mes nivel di servisio di kustumber. Un solushon ta pa habri orario èkstra pa risibí klientenan ku ta bini aserka despues ku departamento di Atmishon otorgá pèrmitnan di estadia na futuro habitantenan di Kòrsou. Den e kaso aki no mester di sita pa e servisio di inskripshon. Despues di inskripshon por traha sita mesora pa renobá/traha sédula einan mes.
Pa inskribí abo i bo famia, bo mester di e siguiente dokumentonan:
- bo pasport bálido ku stèmpel di bo pèrmit di estadia di Organisashon di Atmishon Kòrsou;
- e desishon (Ministeriële Beschikking) tokante bo pèrmit di estadia;
- bo akta di nasementu original (apostille/legalisá), no mas bieu ku 1 aña;
- bo sertifikadonan original di kitamentu for di registro/’uitschrijfbewijs’ (si bo a kita for di registro denter di Reino Hulandes)
- bo adrès korekto aki na Kòrsou (nòmber di kaya i e number).
- bo akuerdo di hür, kontrato di kompra òf pèrmit di e doño/okupante prinsipal di e adrès
- deklarashon di adrès di ROP (Servisio pa Planifikashon Urbano) si ta trata di un adrès nobo, un kaya ku a kambia nòmber òf un adrès ku ahinda no a ta registrá na Kranshi
Si bo ta kasá, divorsiá òf biuda/o, por fabor duna e sertifikado original (ku apostille/legalisá), no mas bieu ku 1 aña.
Tur hende mester presentá personalmente na Kranshi na momentu di hasi inskripshon.
