Resientemente LABdeMED a selebrá grandemente ku e promé graduadonan ku a finalisá nan estudio komo ‘Praktijk Ondersteuner Huisarts’ (POH) ku éksito. Ta trata di 10 POH ku a hasi e estudio bou di guia di Breederode Hogeschool. Ku e trabou di e POH, un dòkter di kas por konta ku sosten di un profeshonal ku ta yud’é monitoriá e pashèntnan ku malesanan króniko òf yuda prevení ku un pashènt ta alkansá e diagnóstiko di un malesa króniko. Promé Minister sr. Gilmar Pisas tabata presente na e seremonia pa konmemorá e momentu históriko akí. El a aploudí LABdeMED públikamente pa duna inisiativa na e trayekto di POH bisando, “E loke LABdeMED a hasi aki a insentivá Gobièrnu. E ta algu grandi i sigur LABdeMED por konta ku Gobièrnu su sosten pa tur loke ku mester, pa futuro di Kòrsou.”
Direktor di LABdeMED sr. Rudy Le Blanc a splika ku parti di e filosofia di LABdeMED ta pa prevení malesanan króniko mas tantu posibel i ku e trabou di un POH ta aportá grandemente na prevenshon. Sifranan lokal ta mustra ku mas ku mitar di nos poblashon ta dil ku un òf mas malesa króniko manera problema di kurason, obesidat, kolesteròl i diabétis. Lamentablemente, hopi hende falta e konosementu di kuido preventivo ku ta kompañá e kambio di estilo di bida ku malesa króniko ta trese kuné. E dòkter di kas ta duna remedi i konseho den un tempu limitá durante su konsulta ku e pashènt, pero e POH ta dediká mas tempu na e pashènt. E ta guia e pashènt den su kambio di estilo di bida, kual ta inkluí e manera di kome, monitoriá medikamentu, duna tepnan pa hasi ehersisio i guia e pashènt pa e biba ku e malesa króniko di tal forma ku ta prevení komplikashonnan manera amputashon, dialisashon, pèrdè bista i otro situashonnan ku por resultá fatal.
POH no ta un konsepto deskonosí den nos region. Aruba i Boneiru su sistema di salubridat ya ta funshoná ku e sosten di POH. Mas o ménos 8 aña pasá Breederode Hogeschool a kuminsá duna lès den nos region, kuminsando promé na Aruba, i despues tambe na Boneiru, St. Eustatius i Kòrsou. Breederode Hogeschool ta un skol privá na Hulanda ku ta spesialisá den kuido i bienestar. E diploma di Breederode Hogeschool ta rekonosí komo un diploma Oropeo ofisial di kalidat haltu. Direktora di Breederode sra. Irma van der Velden a indiká durante su diskurso ku na Hulanda nan tin 1 POH pa kada 1900 habitante. Asina importante e trabou di un POH ta pa nan.
Durante di e seremonia sr. Gino Goeloe di Wit Gele Kruis Aruba a splika tokante e impakto ku e trabou di POH tin na Aruba. El a elaborá ku gran entusiasmo riba e echo ku ya pa mas ku 11 aña nan ta mirando mehoransa den salú di pashèntnan ku tin malesanan króniko na Aruba, komo resultado di introdukshon di POH. Aki na Kòrsou e konsepto di POH ta birando konosí gradualmente. Ta promé bia ku un grupo ta hasi e estudio di POH na Kòrsou. No opstante e logro históriko akí, e sifranan di okupashon di POH na Hulanda ta mustra ku Kòrsou mester di hopi mas POH. Ku e 10 profeshonalnan aki, Kòrsou por konta awor ku 1 POH pa kada 14,800 habitante. Sigur tin espasio pa kresementu.
