Ku e konvikshon i mishon pa fortalesé e ekosistema di e mundu empresarial na Kòrsou, Ministerio di Desaroyo Ekonómiko (MEO) den kolaborashon ku Stichting Beheer MKB Fondsen ku ta kai bou di Kámara di Komèrsio, a lansa Mi NEGOSHI Shared & Support Services djabièrnè 29 di novèmber. E lansamentu akí ta representá nos mishon pa duna sosten i guia na negoshinan mikro, chikí i mediano (MSME) riba nos isla.
E inisiativa di Mi NEGOSHI Shared & Support Services a nase for di un kompromiso ku MEO i Kámara di Komèrsio a kompartí pa duna sosten direkto na empresarionan. Esaki a kuminsá ofisialmente riba 5 di mart, kaminda MEO i Kámara di Komèrsio a firma un akuerdo formal di kolaborashon, e Uitvoeringsovereenkomst, ku a pone e fundeshi pa e insentivo inovativo akí. Ku finansiamentu di MEO i ekspertisio i kolaborashon di Stichting Beheer MKB Fondsen ku ta kai bou di Kámara di Komèrsio, e insentivo akí a bira un realidat. Kreando asina un hub kompleto di sosten pa empresarionan di Kòrsou.
“Nos mishon na Ministerio di Desaroyo Ekonómiko ta pa empoderá nos empresarionan, i awe, ku lansamentu di Mi NEGOSHI Shared & Support Services, nos ta pone e mishon akí den práktika,” Minister Cooper a deklará durante e lansamentu. “E sentro akí ta mas ku solamente un lokalidat, e ta un kompromiso pa ku nos negoshinan lokal, kaminda nos ta duna nan tur e medionan di sosten nesesario, rekursonan i un komunidat di apoyo pa yuda nan logra éksito. Nos ta kere ku kada empresario, sea mikro, chikí òf mediano mester haña oportunidat pa realisá nan potensial i kontribuí na nos ekonomia.”
Mi NEGOSHI Shared & Support Services, situá na Kaya Junior Salas #8, lo ta un sentro kompleto ku ta ofresé rekursonan di orientashon, mentorado i servisionan kompartí ku ta ahustá spesífikamente na e nesesidatnan di negoshinan mikro, chikí i mediano. El lo ta un espasio dediká kaminda empresarionan por kolaborá, haña sosten i risibí un base sólido pa nan negoshi.
E inisiativa akí ta parti di e strategia di MEO pa stimulá kresementu den e sekshon di MSME, un parti esensial di e ekonomia di Kòrsou. Negoshinan mikro, chikí i mediano ta forma 98% di tur negoshinan na Kòrsou, ta kontribuí 30% na e Produkto Bruto Interno (GDP) i ta duna trabou na 60% di e populashon laboral.
“E insentivo akí ta resultado di e trabou di ekipo, vishon i dedikashon di tur hende ku a kontribuí. Nos ta orguyoso di sostené nos empresarionan i ofresé nan e rekurso akí ku nan ta meresé. Huntu nos ta traha pa un futuro mas próspero i fuerte pa Kòrsou,” Minister a agregá.
Ministerio di Desaroyo Ekonómiko i Stichting Beheer MKB Fondsen di Kámara di Komèrsio ta invitá tur empresario pa bishitá Mi NEGOSHI Shared & Support Services na Kaya Junior Salas #8 pa deskubrí kon e inisiativa akí por sostené e kresementu di nan negoshi òf futuro negoshi. E lansamentu akí ta marka no solamente e kuminsamentu di un servisio, pero tambe un kapítulo nobo pa desaroyo di negoshi riba nos isla.
